image Raportimi i Sinjalit/ Suspendohet komandanti dhe 6 zyrtarë të Stacionit Policor në Gjakovë

Ekskluzive

Raportimi i Sinjalit/ Suspendohet komandanti dhe 6 zyrtarë të Stacionit Policor në Gjakovë

news image

Gazeta Sinjali ka raportuar ekskluzivisht për një rast në Gjakovë ku janë zhdukur provat me qëllim të mbulimit të momentit kritik në të cilin ishte i përfshirë zyrtari policor Arban Lajqi, plumbat e të cilit jo vetëm që rrezikuan jetën e motoçiklistit, por edhe të qytetarëve përreth.

Burime të Gazetës Sinjali bëjnë me dije se si rezultat i kësaj, hetimet e zhvilluara nga Prokuroria Themelore në Gjakovë dhe Inspektorati Policor i Kosovës, deri më tani kanë siguruar prova të mjaftueshme për implikimin e këtyre zyrtarëve në manipulimin dhe shkatërrimin e provave, e për të cilët tashmë ka filluar zyrtarisht edhe hetimi penal.

Me kërkesë të IPK-së, Gazeta Sinjali mëson se sot janë suspenduar nga detyra këta zyrtarë policorë:

-Arban Lajqi, zyrtar policor

– Toger Ilmi Agaj, mbikëqyrës i ndërrimit në stacionin policor të Gjakovës

– Hysni Morina, zyrtar policor në stacionin policor të Gjakovës

– Tush Markaj, Major, U.D. i komandantit të stacionit policor në Gjakovë

– Shkelzen Lajqi, zyrtar policor në stacionin policor të Gjakovës

– Baredin Hoti, staf civil në stacionin policor të Gjakovës

– Adrian Lukaj, zyrtar policor në stacionin policor të Gjakovës

Përveç Arban Lajqit, gjashtë zyrtarët e tjerë dyshohet se kanë konsumuar veprën penale “Keqpërdorimi i detyrës apo autoritetit zyrtar” dhe këto veprime i kanë ndërmarrë në bashkëkryerje, siç parashihet në nenin 31 të Kodit Penal të Republikës së Kosovës.

Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.

/GazetaSinjali/