Gazeta Sinjali raportoi ekskluzivisht për një ngjarje të rëndë që ka tronditur mëngjesin e së martës Gjakovën, ku një burrë i moshuar është gjetur pa shenja jete në rrethana që dyshohet se lidhen me vetëvrasje.
Sinjali mëson se viktima është Muhamet Pozhegu, ku rasti ka ndodhur rreth orës 04:30 në rrugën “Adem Jashari”.
Siç mësoi Sinjali, një qytetar, i cili punonte në një lokal që e kishte me qira nga viktima, kishte dalë në vendin e punës për të marrë material ndërtimor.
Në pjesën e pasme të lokalit ai ka vërejtur trupin e një personi të varur në litar.
I tronditur nga ajo që pa, ai ka njoftuar menjëherë Policinë dhe ekipin e Emergjencës. Vetëm më pas ka kuptuar se personi i pajetë ishte pronari i lokalit.
Në vendin e ngjarjes kanë dalë njësitë relevante policore dhe ekipi mjekësor, i cili në orën 07:20 ka konstatuar vdekjen e viktimës.
Djali i viktimës, në deklarimin e tij para hetuesve, ka bërë të ditur se babai i tij kishte ndryshuar dukshëm pas vdekjes së bashkëshortes dhe se humbja e saj kishte lënë pasoja të mëdha në gjendjen e tij emocionale dhe psikologjike.
Lidhur me rastin është njoftuar prokurori kujdestar për krime të rënda, i cili ka urdhëruar që trupi i pajetë të dërgohet në Institutin e Mjekësisë Ligjore për obduksion, me qëllim të sqarimit të plotë të shkakut të vdekjes.
Më vonë, është bërë edhe tërheqja e trupit nga ekipi i IML-së.
Hetimet për këtë rast janë në vazhdim dhe autoritetet pritet të hedhin dritë mbi të gjitha rrethanat që çuan në këtë ngjarje tragjike.
Sinjali – aty ku e vërteta flet para lajmit!
