Për shkak të dëgjimit të një dëshmitari, sërish është mbyllur për publikun dhe mediat seanca gjyqësore që po mbahet këtë të hënë në Gjykatën Themelore në Prishtinë, në rigjykimin e Enver Sekiraqës.

Sekiraqa po akuzohet për nxitje të vrasjes së zyrtarit policor Triumf Riza, vrasje e cila kishte ndodhur në gusht të vitit 2007, raporton “Betimi për Drejtësi”.

Prokurori Special Haki Gecaj ka kërkuar nga gjykata që të mbyllet për publikun seanca e së hënës, pasi sipas tij, një dëshmitar për të cilin nuk e bëri të ditur emrin e tij, ka kërkuar që dëshmia e tij të jepet pa praninë e publikut për shkaqe personale dhe familjare.

“Pas analizimit të kërkesës së këtij dëshmitari, unë para jush deklaroj se kam pasur mirëkuptim për kërkesën e saj dhe propozoj që ai dëshmitar të dëgjohet pa praninë e publikut”, ka thënë prokurori Gecaj.

Pasi propozimin e tij nuk e ka kundërshtuar as mbrojtja e Sekiraqës, avokatja Kosovare Kelmendi, trupi gjykues i udhëhequr nga gjykatësi Agim Kuçi, aprovuan propozimin e prokurorit, pasi sipas tij edhe në fazat e mëhershme ky dëshmitar ishte dëgjuar me dyer të mbyllura.

Për të njëjtën arsye, ishte mbyllur për publikun edhe seanca e kaluar, e mbajtur më 29 prill 2021.

Gjykata Themelore në Prishtinë, për herë të dytë më 16 shtator 2019, e kishte shpallur fajtor Enver Sekiraqën për nxitje në vrasjen e ish-policit Triumf Riza dhe i kishte shqiptuar dënim në kohëzgjatje prej 30 vitesh.

Mirëpo, Gjykata e Apelit me 6 mars 2020, kishte vendosur të aprovojë ankesën e mbrojtjes së Sekiraqës duke e kthyer rastin për të dytën herë në rigjykim, pasi sipas Apelit aktgjykimi i shkallës së parë ishte marrë me shkelje të dispozitave të procedurës penale.

Triumf Riza u vra më 30 gusht të vitit 2007, vrasje për të cilën Arben Berisha është dënuar me 35 vjet burg, ndërsa Enver Sekiraqa me 37 vjet.  /Gazeta Sinjali/