image Nuk kalon marrëveshja në Kuvend për transferimin e personave të dënuar

Kosovë

Nuk kalon marrëveshja në Kuvend për transferimin e personave të dënuar

news image

Në mungesë të vendimmarrjes në Kuvend, nuk ka kaluar Projektligji për ratifikimin e Marrëveshjes ndërmjet Qeverisë së Republikës së Kosovës dhe Qeverisë së Republikës së Italisë për transferimin e personave të dënuar, njofton Gazeta Sinjali.

Edhe pse të gjitha partitë politike u shprehën pro ratifikimit të kësaj marrëveshje, mungesa e propozuesit të projektligjit, ministrit të Drejtësisë, bëri që Lëvizja Vetëvendosje të përmbahet nga votimi.

Kryetari i Komisionit për Legjislacion, deputeti i LDK-së, Shkëmb Manaj tha se kjo iu ndihmon të dënuarve për rehabilitim shoqëror.

“Rëndësia e transferimit të personave të dënuar qëndron në faktin se iu ndihmon të dënuarve për rehabilitim shoqëror dhe me këtë marrëveshje Kosova merr përsipër obligimet ndaj shtetasve të saj të cilët mund të jenë të dënuar dhe mund të jenë duke vuajtur dënimin në Itali”, tha ai.

Përkundër përkrahjes, kritika për mungesën e ministrit Selimi adresoi deputeti i LVV-së, Dimal Basha.

“A është me rëndësi për qytetarët e Kosovës të shohin këtë qeveri të brishtë ku ministrat nuk vijnë as të prezantojnë marrëveshjet ndërkombëtare që janë shumë të rëndësishme. Derisa na akuzojnë se ne nuk jemi për të ndihmuar qytetarët. Kjo është një marrëveshje ndërkombëtare që është aprovuar në komision, por ministri nuk ka gjetur kohë të vijë këtu. Ne si subjekt politik e përkrahim”, tha ai.

Ndërsa, nënshkruesi i kësaj marrëveshje, ish-ministri i PDK-së, Abelard Tahiri tha se nëse ratifikohet kjo marrëveshje qytetarëve iu mundësohet të vijnë dhe dënimin të vuajnë në Kosovë.

“Kjo është një marrëveshje që unë e kam nënshkruar sa kam qenë ministër i Drejtësisë. Kemi një numër të qytetarëve që vuajnë dënime në qendrat korrektuese në Itali dhe nëse ratifikohet kjo marrëveshje atyre iu mundësohet të vijnë dhe dënimin të vuajnë në Kosovë”, u shpreh ai.

Më tej, mungesën e ministrit të Drejtësisë, e arsyetoi shefi i grupit parlamentar të AAK-së, Daut Haradinaj, duke thënë se ministri është në takim zyrtar. /Gazeta Sinjali/