Ylli i Milanit, Zlatan Ibrahimovic beson se nuk ka ‘favorit’ mes Milanit dhe Tottenhamit në Ligën e Kampionëve dhe insiston se kuqezinjtë ende besojnë në Scudetto.
Suedezi është ndër të ftuarit në Globe Soccer Awards në Dubai, ku Paolo Maldini dhe Ricky Massara janë ndër kandidatët për drejtorin më të mirë sportiv të vitit, ndërsa Paolo Scaroni mund të shpallet presidenti më i mirë.
Ibra aktualisht po rikuperohet nga një dëmtim në gju dhe shpreson të rikthehet në janar.
“Unë jam duke punuar dhe shpresoj se do të marr diçka”, tha ai për Sky Sport Italia.
“Ky është mentaliteti im, ky është një sezon ndryshe. Nuk mund të isha aty në pjesën e parë, shpresoj se do të kthehem për të dytën. Skuadra është përmirësuar që kur erdha unë. Napoli po bën më mirë se ne, por pjesa e dytë e sezonit është më e rëndësishmja”.
I pyetur se a beson Milani ende te titulli i Serie A dhe çfarë mendon për ndeshjen e 16-të të Champions League me Tottenham, ai u përgjigj:
“Pse të mos bëjmë? Ne e bëjmë gjithmonë”, tha Ibrahimovic duke folur për garën për titull në Itali.
“Liga e Kampionëve është gjithmonë e vështirë, është një lojë e hapur dhe nuk mendoj se ka favoritë. Është thelbësore të ndihesh mirë pikërisht në atë moment.”
“Maldini dhe Massara? Ata janë duke bërë një punë të shkëlqyer, është gjithashtu falë tyre që Milani ka qenë i suksesshëm. Ne po rritemi, klubi është në duar të reja dhe të gjithë po bëjmë një punë të shkëlqyer”.
Ibra, 41 vjeç, ka shënuar 92 gola në 159 paraqitje me Milanin, ku u rikthye për një periudhë të dytë në janar 2020.
Ai shënoi tetë gola në 23 paraqitje në të gjitha garat sezonin e kaluar, kur kuqezinjtë fituan titullin e tyre të parë në Serie A në 11 vjet.
Kontrata e tij në San Siro skadon në fund të sezonit.
