image Ibrahimovic pranë rikthimit nga dëmtimi, paralajmëron kundërshtarët

Futboll

Ibrahimovic pranë rikthimit nga dëmtimi, paralajmëron kundërshtarët

news image

Zlatan Ibrahimovic konfirmoi se do të rikthehet në aksion së shpejti dhe dha disa mendime për të ardhmen e tij.

Kontrata e sulmuesit 40-vjeçar suedez skadon me Milanin në fund të këtij sezoni, por atij do t’i ofrohet një rinovim i kontratës për një vit nëse ai dëshiron të vazhdojë aventurën e tij me kuqezinjtë. Ai ka qenë një figurë e rëndësishme në skuadrën e Stefano Piolit, duke qenë pikë referimi dhe lider me përvojë në dhomat e zhveshjes.

Duke folur për Radio 105, Ibrahimovic fillimisht diskutoi gjendjen e tij fizike dhe se kur do të kthehet në aksion.

“Nëse do të kthehem së shpejti? Kjo është e sigurt. Kam besim në çdo gjë që po bëj. Se sa larg do të shkoj nuk e di, por gjithmonë përpiqem të kaloj lart. Pse të jesh normal kur mund të jesh më i fortë?”, ka potencuar ai.

Ish-sulmuesi i Paris Saint-Germain dhe LA Galaxy foli më pas për të ardhmen e tij, duke konfirmuar dëshirën e tij për të vazhduar të luajë.

“Le të shohim për të ardhmen. Jam kurioz për disa gjëra, si për shembull të bëhem aktor…. Diçka që më jep adrenalinë. Por, asgjë nuk do të jetë si futbolli. Do të më duhet të bëj një ndryshim”.

“Kam shumë projekte, por për momentin fokusi im është të jem futbollist. Kur të kthehem do të rrëzoj të gjithë stadiumin”.

Ai preku mundësinë për të fituar Scudetto këtë sezon me Milanin.

“Nëse do të fitoja me këtë ekip, do të më jepte më shumë kënaqësi se dhjetë vjet më parë”.

Së fundi, Ibrahimovic diskutoi nëse ai po mendon të largohet së shpejti.

“Është Ibra ai që vendos se kur të ndalet. Shumë njerëz vazhdojnë të më thërrasin të mbaruar, por më duartrokasin më pas”.

40-vjeçari Ibrahimovic ka shënuar tetë gola dhe ka dhënë dy asistime në 15 paraqitje në Serie A këtë sezon, duke u bërë ende mbresëlënës pavarësisht një problemi të përsëritur të tendinit të Akilit. /Gazeta Sinjali Sporti/