Fabio Capello sheh një rrezik për Milanin në rrugën e tyre për të ruajtur titullin e Serie A dhe shpreson që kuqezinjtë të shmangin Liverpoolin në shortin e fazës së grupeve të Ligës së Kampionëve.
Djelmoshat e Stefano Piolit e filluan sezonin me një fitore 4-2 ndaj Udineses fundjavën e kaluar dhe e kanë forcuar skuadrën këtë verë duke nënshkruar me Divock Origi dhe Charles De Ketelaere. Ata janë ende në kërkim të një qendërmbrojtësi të ri dhe një mesfushori qendror.
“Milani po punon për të forcuar ekipin, por do të jetë një garë e hapur me Juventusin, Interin, Napolin dhe Romën. Pesë skuadra që kanë atë që duhet për të kaluar deri në fund, me trajnerë që tashmë kanë fituar”, tha Capello për La Gazzetta dello Sport.
Ish-lojtari dhe trajneri i kuqezinjve e sheh Milanin ndër të preferuarit, por paralajmëron kuqezinjtë dhe trajnerin e tyre.
“Rreziku është në kokë, veçanërisht kur stërvitni lojtarë që nuk janë mësuar të fitojnë vazhdimisht. Kur dikush fiton mendon se gjithçka është bërë, por në një klub si Milani, të fitosh do të thotë të përmbushësh detyrën tënde.
Ata duhet të harrojnë kujtimet dhe të fillojnë nga e para, duke menduar për të tashmen.”
Çfarë do të ndryshojë për Milanin këtë sezon?
“Perceptimi i kundërshtarëve ndryshon kur ata shohin një ekip me Scudetton në gjoks”, vuri në dukje Capello.
“Përpara se të mendonin se mund të fitonin, tani duan ta bëjnë atë. Ka një gjë që më shqetëson për Milanin.
Kur stërvita kuqezinjtë, ndonjëherë nuk isha i kënaqur me intensitetin që kisha parë në stërvitje dhe misioni im ditën tjetër ishte të ktheja vëmendjen në një nivel të duhur. Pioli duhet të shënojë çdo detaj, çdo zile të vogël alarmi dhe ta korrigjojë atë.
Milani ishte klubi më i mirë në botë sepse të gjithë mendonin të fitonin. Është një koncept që Pioli ua transmetoi lojtarëve të tij sezonin e kaluar”.
Një nga objektivat e sezonit për kuqezinjtë do të jetë kualifikimi në raundin e 16-të të Champions League. Ata luajtën në kompeticionin elitar të Evropës për herë të parë në tetë vjet sezonin e kaluar, por u eliminuan në fazën e grupeve.
Kësaj radhe do të jenë në vazon 1, ‘kampionët’ ndërsa një vit më parë ishin në vazon 3 dhe ranë në short me Liverpoolin, Porton dhe Atletico Madridin.
Capello beson se të kuqtë e Jurgen Klopp janë ende skuadra që duhet shmangur.
“Ka pesë skuadra që duhen shmangur në shortin e Champions League: City, Liverpool, Real, PSG dhe Bayern”, tha Capello. “Por përveç Liverpoolit, të tjerët janë në të njëjtin vazo me Milanin“, përfundoi italiani.
