Gjatë ditës së sotme në Kosovë janë raportuar katër persona të vdekur, shkruan Gazeta Sinjali.
Fillimisht, në mesditë, në fshatin Vragoli të Fushë-Kosovës, një 33-vjeçare është gjetur pa shenja jete. Policia dhe Prokuroria kanë konfirmuar vdekjen e saj, teksa Sinjali nga burimet ka mësuar se motra e viktimës e ka mbytur atë duke e ngufatur me jastëk.
Kurse, gjatë pasdites, dy fëmijë, të moshës 8-vjeçare vdiqën si pasojë e një aksidenti në fshatin Carralevë të Shtimes.
Policia bëri të ditur se deri tek aksidenti dyshohet të ketë ardhur kur një automjet i udhëtarëve gjatë lëvizjes për shkak të mosrespektimit të shpejtësisë, ka humbur kontrollin dhe ka kaluar në shiritin e kundërt duke i goditur për vdekje dy këmbësorët në trotuar.
Ndërsa, në një aksident tjetër trafiku në rrugën Mitrovicë – Prishtinë, ka ndërruar jetë një 66-vjeçar.
Sinjali ka mësuar se si pasojë e aksidentit dhe lëndimeve të pësuara viktima ka ndërruar jetë në QKUK, ndërsa trupi i pajetë i tij është dërguar për obduksion.
