Organizatorët e Kupës së Botës do të ndalojnë shitjen e të gjitha birrave me alkool në tetë stadiumet e përdorura për turneun e futbollit, ka bërë të ditur për Associated Press një person me njohuri për vendimin.
Vendimi vjen vetëm dy ditë para fillimit të ndeshjeve në Katar.
Birra pa alkool do të jetë në dispozicion për tifozët në 64 ndeshjet, tha burimi i cili foli në kushte anonimiteti sepse organizatorët ende nuk e kanë shpallur vendimin.
Kompania mëmë e Budweiser, AB InBev, paguan dhjetëra miliona dollarë në çdo Kupë Botërore për të drejtat ekskluzive për të shitur birrën. Partneriteti i kompanisë me FIFA-n filloi në turneun e vitit 1986.
Kur Katari nisi ofertën e tij për të pritur Kupën e Botës, vendi ra dakord të respektonte partnerët tregtarë të FIFA-s dhe përsëri kur nënshkroi kontratat pasi fitoi votën, në vitin 2010.
Në Kupën e Botës 2014 në Brazil, vendi pritës u detyrua të ndryshojë një ligj për të lejuar shitjen e alkoolit në stadiume.
