Jo rrallëherë prindërit kosovarë kanë përfunduar në Polici si rezultat i denoncimit nga fëmijët e tyre, të cilët i raportojnë për keqtrajtim. Në shumicën e këtyre rasteve, viktima janë të miturit, ndaj të cilëve ushtrohet dhunë fizike e psikike. Për një rast të tillë, mbrëmë në Prishtinë, ka rënë në pranga të Policisë një person, raporton Gazeta Sinjali.
Burimet nga Prokuroria bëjnë me dije se i dyshuari (emër i njohur për redaksinë, që nuk do të publikohet me qëllim të ruajtjes së identitetit të viktimës së mitur) u arrestua pasi vajza e tij raportoi në Polici se ai ka ushtruar dhunë ndaj saj pasi ajo kishte shkuar për ta vizituar.
Viktima nuk jeton me babain e saj pasi prindërit janë ndarë dhe kishte vendosur që pas një viti nga takimi i fundit, të shihet me babain e saj, por lëre që nuk kaluan kohë bashkë, por ai edhe e rrahu.
Posa Policia ka marrë informacionin, njësitet policore kanë kapur dhe shoqëruar në stacion policor të dyshuarin dhe vajzën.
Dy palët janë intervistuar para hetuesve dhe kanë dhënë deklaratat e tyre në lidhje me rastin. Në bazë të informacioneve të para dhe dëshmive të mbledhura, Prokurori i Shtetit ka vendosur që ndaj të dyshuarit të iniciohet rasti për “Dhunë në familje”.
