Inspektorati Policor i Kosovës ka njoftuar se ka rekomanduar suspendimin e tre zyrtarëve policorë, një kapiteni, një rreshteri dhe një zyrtari policor, të cilët ishin në detyrë në momentin kur Milan Radoiçiq ka ikur nga pika e kalimit kufitar në Bërnjak.
“IPK mbrëmë ishte njoftuar nga Policia e Kosovës rreth një incidenti i cili kishte ndodhur në pikë kalimin kufitar në “Bërnjak” në Drejtorinë Rajonale Kufitare Veriu ku gjatë procedurave të kalimit kufitar në hyrje ishte paraqitur një i dyshuar (me inicialet M.R) dhe i njëjti kishte rezultuar si person i kërkuar.”
Dyshohet se Radoiçiq është kthyer mbrapa me veturën e tij, derisa zyrtarët policorë po kryenin procedurat e verifikimit.
“Personi i kërkuar dyshohet se ka vozitur veturën e tij mbrapa dhe është kthyer prapë në drejtim të Serbisë, ndërsa dokumentet e tij kishin mbetur tek zyrtarët policorë të pikë kalimit kufitar.
Hetuesit e IPK-së në konsultim me Prokurorinë Themelore në Ferizaj kanë filluar një procedurë hetimore ndaj tre zyrtarëve policorë me dyshimin se të njëjtit kanë kryer veprën penale “Keqpërdorim i pozitës apo autoritetit zyrtar”.”
Arratisja e Milan Radoiçiqit nuk është kapur fare nga kamerat e sigurisë në pikën kufitare në Bërnjak, pasi të njëjtat nuk kanë funksionuar.
Lajmin e ka konfirmuar për Gazetën Sinjali edhe prokurori Rasim Maloku, i cili tha se kanë nisur hetime për këtë çështje.
“Po kanë filluar hetimet prej Inspektoratit Policor, është rekomandu edhe suspendimi i tre policëve dhe vërtetohet se në çfarë rrethanash ka ikur Radoiçiqi”, tha Maloku për Sinjalin.
Radoiçiq i është arratisur Policisë së Kosovës mesditën e së enjtes, në pikën kufitare në Bërnjak.
