Dhuna në familje mbetet një fenomen tejet shqetësues në Kosovë, aq më tepër kur të gjitha viktimat e dhunës janë kryesisht gra, raporton Gazeta Sinjali.
Vetëm në 24 orët e fundit, siç ka mësuar Sinjali, janë raportuar 7 raste të dhunës në familje.
Sinjali mëson prej burimeve se një rast është raportuar në Klinë, në fshatin Doberdol, ku pas një mosmarrëveshjeje burri e ka sulmuar fizikisht gruan.
Viktima ka kërkuar ndihmë mjekësore e më pas është dërguar te familja e saj.
Një tjetër rast ka ndodhur në rrugën “Paqja” në Prizren. Një grua e komunitetit ashkali ka njoftuar se është sulmuar fizikisht nga burri i saj nga komuniteti rom. Viktima pranoi tretman mjekësor.
Në fshatin Mushtisht, Suharekë, po ashtu është sulmuar fizikisht një grua.
Viktima, me pëlqimin e saj është dërguar te familjarët e saj.
Një dhunë tjetër në familje ka ndodhur në rrugën “Nazim Gafurri” në Prishtinë. Një grua ka njoftuar se është kanosur nga ish-i fejuari i saj, derisa të njëjtit i është caktuar masa e ndalimit policor për 48 orë.
Rasti tjetër është raportuar në fshatin Bardh i Madh në Fushë-Kosovë. Siç mëson Sinjali, edhe këtu viktimë ishte një grua. Ajo ka njoftuar se është kanosur e fyer nga burri i saj, derisa i njëjti është dërguar në mbajtje.
Ndërsa në rrugën “Ferid Curri” në Prishtinë, një grua ka raportuar se pas një mosmarrëveshjeje është sulmuar nga burri i saj.
Ajo bashkë me dy fëmijët e saj është larguar nga banesa dhe siç ka mësuar Sinjali, ka shkuar te familja e saj pasi ka thënë se aty ndihet e sigurt.
Viktimës i është ofruar tretman mjekësor por ajo nuk ka pranuar.
Dhe rasti i fundit ka ndodhur në Hajvali. Një grua ishte sulmuar fizikisht nga burri para disa ditëve. I dyshuari, siç mëson Sinjali, dje rreth orës 10:00 është vetëparaqitur në stacionin policor derisa edhe është arrestuar.
Sinjali më herët pati raportuar se rastet e dhunës në familje kanë shënuar rritje për 30 për qind që nga koha kur në Kosovë është shpallur pandemia dhe vendi hyri në izolim.
Polica e Kosovës, në anën tjetër, në vazhdimësi kërkon nga të gjithë qytetarët që të mos shfaqin dhunë ndaj askujt, sidomos në këtë kohë kur vendi është duke kaluar nëpër pandeminë e shkaktuar nga koronavirusi i ri.
“Policia e Kosovës edhe përkundër angazhimeve shtesë këto raste i trajton me prioritet dhe bën apel për të gjithë personat nëse janë pre e dhunës në familje ose çfarëdo lloj dhune tjetër, t’i raportojnë këto raste përmes numrave të telefonit 192 dhe 080019999 apo në stacionin më të afërt policor”, thuhet në përgjigjen e Policisë së Kosovës.
