Policia e Kosovës ka kapur katër të kërkuarit për kontrabandë, mirëpo njërin prej tyre e ka liruar me urdhër të prokurorit, shkruan Sinjali.
Personat me inicialet V.H., M.H., M.V. dhe A.N. janë intervistuar, por pastaj tre janë dërguar në mbajtje dhe një është liruar.
Por në lidhje me këtë aksion Policia ka shpallur në kërkim dhjetë persona.
Aksioni i 13 tetorit ishte aksion kundër kontrabandës, mirëpo në veri pati shumë pakënaqësi nga banorët serbë.
Gjatë këtij aksioni pati edhe policë e qytetarë të lënduar. Madje qytetarët serbë sulmuan edhe ekipet e gazetarëve që ishin duke i ndjekur zhvillimet atje.
Njoftimi i plotë:
Pas realizimit të operacionit policor në luftën kundër krimit të organizuar dhe kontrabandës me mallra, të datës 13.10.2021 në rajonin e Prishtinës, Pejës, Mitrovicës Jugu dhe Mitrovicës Veri, ku ishin arrestuar tetë persona të dyshuar dhe shpallur në kërkim dhjetë persona tjerë të dyshuar, policia ka vazhduar hetimet intensive drejtë arrestimit dhe sjelljes para organeve të drejtësisë të të dyshuarve që ishin në kërkim.
Pas veprimeve operacionale dhe vendosjes në kërkim të personave të dyshuar, sot me 15.10.2021 hetuesit policorë kanë intervistuar edhe katër nga të dyshuarit që kanë qenë në kërkim policorë.
Personat e intervistuar nga zyrtarët policorë janë: V.H., (1978), M.H., (1981), M.V., (1994) dhe A.N., (1982), të cilët pas intervistimit, me urdhër të prokurorit tre të dyshuar janë dërguar në mbajte, përderisa njëri nga të dyshuarit është liruar në procedurë të rregullt.
Policia e Kosovës mbetet e përkushtuar në vazhdimin e hetimeve intensive drejtë sjelljes para organeve të drejtësisë edhe të persona tjerë të dyshuar të përfshirë në këtë veprimtari kriminale.
