Një përleshje masive ka ndodhur në orët e para të mëngjesit të sotëm në fshatin Landovicë të Prizrenit. Në një lokal me muzikë live ku po argëtoheshin shumë qytetarë shpërtheu një rrahje me ç’rast u përdor edhe thika, që la disa persona të lënduar. Sinjali ka mësuar se si ndodhi ngjarja në lokalin “Nidi” dhe ju sjell detaje.

Gjithçka dyshohet se ndodhi rreth orës 03:30 të mëngjesit pas një mosmarrëveshje që disa persona kishin mes vete, derisa ishin dukë u argëtuar me muzikë live.

Në përleshjen masive dyshohet se ishte i përfshirë edhe pronari i lokalit, i cili bashkë me katër persona të tjerë pësuan lëndime. Siç mëson Sinjali dy prej tyre janë dërguar në Qendrën Klinike Universitare të Kosovë për shkak të gjendjes së rëndë.

Katër nga të lënduarit, të cilët po ashtu dyshohen për këtë rast janë trajtuar në Spitalin Rajonal të Prizrenit. Ndërsa i dyshuari tjetër fillimisht ka tentuar të ikë  nga vendi i ngjarjes, duke shkaktuar edhe aksident trafiku. Por nuk i shkoi gjatë në arrati, pasi nga familjarët e tij u dërgua në spital për të marrë trajtim mjekësor.

Rastin për Sinjalin e kanë konfirmuar edhe nga Policia e Kosovës dhe kanë njoftuar se deri më tani dy persona janë prangosur, derisa edhe dy të tjerë gjenden në arrati.

Sipas Policisë, dy personat e arrestuar me vendim të prokurorit u është caktuar masa e ndalimit prej 48 orësh.

Sinjali do të ju mbajë të informuar me detajet e reja të rastit. /GazetaSinjali/