Deputetja nga radhët e PDK-së, Ganimete Musliu ka akuzuar udhëheqësit e Policisë së Kosovës se janë vënë në shërbim të Lidhjes Demokratike të Kosovës, shkruan Gazeta Sinjali.
Musliu përmes një postimi në Facebook u shpreh se përderisa vjedhjet, grabitjet, plaçkitjet dhe sulmet janë kthyer në lajme ditore, udhëheqësit e Policisë më shumë shqetësohen për imazhin e LDK-së se sa për sigurinë e qytetarëve duke bërë krahasime statistikore pa asnjë analizë të mirëfilltë.
“Siguria e brendshme nuk është as për së afërmi në nivelin e duhur. Se në çfarë niveli është siguria shtetërore, mjafton të kujtohen kontrabandistët, xhandarmëria dhe provokimet e shtetit serb që hyjnë e dalin si “n’bahçe të babës” për t’i dhënë kësaj qeverie notën më të dobët nga të gjitha qeveritë e deritashme”, shkroi ajo.
Sipas Musliut, duke iu drejtuar Policia e Kosovës duhet të jetë garancë e mbrojtjes së rendit dhe ligjit dhe që kujdeset për sigurinë e qytetarëve edhe nëse kryeministrat dhe partitë gabojnë.
“Politikanët shkojnë e vijnë. Policia është e Kosovës. Larg duart nga Policia!”, përfundoi Musliu.
