Gazeta Sinjali sot raportoi se një person në Prizren ka kërcënuar Policinë në rrjetin social Facebook, në një postim ku thuhej se Policia në këtë rajon, po kontrollon personat e vetizoluar, pas infektimit me COVID-19. Sinjali mëson se i dyshuari i cili u dërgua në ndalim prej 48 orësh për kanosje është Mentor Çeriqi (1980).
Siç mëson Gazeta Sinjali, i dyshuari më 3 shtator kishte komentuar në një postim duke shkruar “aaa let hin diku ku s’duhet e te hajn plumin naj kun tani marin vesh ka mju ardh funi mdoket edhe policise qe kan qu kry shume….”.
Por ky koment i kushtoi atij. Burimet e Sinjalit brenda Prokurorisë kanë njoftuar se pasi është identifikuar i dyshuari, i njëjti është shoqëruar në Stacion Policor dhe në konsultim me prokurorin ndaj tij është iniciuar rast, si i dyshuar për veprën penale “kanosje”.
Po ashtu me urdhër të prokurorit, i njëjti është dërguar në ndalim për 48 orë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
