Në orët e mëngjesit të sotëm, Policia ka intervenuar në një rast ku janë rrahur katër persona me grushte e mjete të forta, pas një zënke në rrugën “Ibrahim Rugova” në Prizren, raporton Gazeta Sinjali.
Burimet e Gazetës Sinjali brenda Prokurorisë bëjnë të ditur se personat e dyshuar janë Ardit Braha 24-vjeçar, Arlind Braha 27-vjeçar dhe Hil Paluca 24-vjeçar.
Sinjali mëson se fillimisht, pak para orës 05:00, Policia ka gjetur në këtë rrugë një të ri të shtrirë në tokë dhe një vajzë e cila ka qenë e përfshirë në rast, është hasur në afërsi të stacionit të autobusëve. Ndërsa për dy të dyshuarit e tjerë, patrulla policore është njoftuar nga Emergjenca.
Burimet e Sinjalit brenda Spitalit rajonal të Prizrenit kanë njoftuar se dy nga personat e dyshuar janë dërguar në Emergjencë për të marrë trajtim, për shkak të lëndimeve që kanë pësuar. Sipas këtyre burimeve, njëri prej tyre ka marrë lëndime të rënda, për çka mjeku ka rekomanduar që i njëjti t’i nënshtrohet operimit. Ndërkohë që Policia ka sekuestruar një thikë që dyshohet të jetë përdorur gjatë përleshjes.
Po ashtu Sinjali mëson se njërit nga vëllezërit Braha si pasojë e therjes me thikë i është përkeqësuar gjendja shëndetësore dhe është dashur që urgjentisht t’i nënshtrohet një ndërhyrjeje mjekësore në Spitalin e Prizrenit.
Pas ndërhyrjes gjendja e tij është stabilizuar dhe i njëjti është jashtë rrezikut për jetë. Ndërkaq vëllai tjetër është liruar në procedurë të rregullt.
Gjatë ditës lajmin për Sinjalin e kanë konfirmuar edhe nga Policia e rajonit të Prizrenit.
Zëdhënësi Vesel Gashi tha se palët e përfshira në rast kanë marrë trajtim mjekësor dhe janë ndaluar, ndërkohë që do të vazhdojnë me procedurat e tjera.
