Inspektorati Policor i Kosovës ka nisur hetimet ndaj eprorëve të Policisë në veri të vendit të cilët ishin pjesë e takimit me presidentin e Serbisë, Aleksandar Vuçiq, ku u diskutua për vendimin e Qeverisë së Kosovës për moslejimin e zgjedhjeve serbe në territorin e Kosovës.
Këtë e ka bërë të ditur zëdhënësi i IPK-së, Arbër Beka, i cili ka thënë se ky institucion, në kuadër të kompetencave dhe autorizimeve ligjore, është duke shqyrtuar pjesëmarrjen e eprorëve të Policisë së Kosovës në takim me presidentin serb, raporton Gazeta Sinjali.
“Duke ju referuar kërkesës suaj ju njoftojmë se Inspektorati Policor i Kosovës është njoftuar zyrtarisht për këtë çështje dhe se në kuadër të kompetencave dhe autorizimeve ligjore është duke e shqyrtuar çështjen e pjesëmarrjes së eprorëve të Policisë së Kosovës në takim me Presidentin e Serbisë”, tha Beka për Gazetën Sinjali.
E për pjesëmarrjen në takimin me presidentin serb, Këshilli Gjyqësor i Kosovës ka marrë vendim që ta suspendojë kryetaren e Gjykatës Themelore në Mitrovicë, Liljana Stevanoviq.
“Në fund, Këshilli vazhdoi takimin me dy (2) pika të mbyllura për: shqyrtimin e njoftimit AGJ.nr.93/2022 të Kryetares së Gjykatës Themelore në Mitrovicë si dhe themelimin e panelit hetimor për rastin disiplinor Nr.AD/KGJK/07/2022/GJTHPR-AD/GJTHPR.nr.12/2022, me ç’rast vendosi për suspendim të Kryetares së Gjykatës Themelore në Mitrovicë, L.S, deri në vendimin e rradhës”, thuhet në njoftim.
Më 3 prill, Serbia do të mbajë zgjedhje presidenciale dhe parlamentare dhe serbët e Kosovës, sipas Vuçiq, do të votojnë në komunat në Serbinë Qendrore.
