Pep Guardiola është ankuar se “të gjithë” në Mbretërinë e Bashkuar mbështesin Liverpoolin ndaj skuadrës së tij Manchester City, teksa nuk ka ngurruar edhe ta thumbojë skuadrën nga Merseyside.
Man City fitoi me rezultat të thellë 5-0 ndaj Newcastle për të kaluar tre pikë përpara Reds pas barazimit të Jurgen Klopp me Tottenham të shtunën, duke bërë një hap përpara drejt titullit.
Trajneri i Man Cityt, mendon se në Angli të gjithë po e mbështesin Liverpoolin.
“Një javë më parë, askush nuk [mendonte se do të ishim kampionë]”, tha Guardiola për beIN SPORTS në kohë të plotë. “Të gjithë në këtë vend mbështesin Liverpoolin, mediat dhe të gjithë.
“Sigurisht, Liverpool ka një histori të jashtëzakonshme në Evropë. Jo në Premier League – ata kanë fituar një në 30 vjet. [Por] situata është kjo që është. Ne duhet të marrim nëntë pikë, ndoshta gjashtë tani.
“Varet se çfarë do të ndodhë gjatë dy ndeshjeve të ardhshme. E mërkura [kundër Wolves] është një finale e vërtetë, e vërtetë, e vërtetë për ne. Fati ynë është në duart tona dhe kjo është e rëndësishme”, u shpreh Guardiola.
Me një udhëtim te Wolves në mesjavën e ardhshme në axhendë, City i kanë mbetur vetëm tre ndeshje këtë sezon për të vulosur një mbrojtje të suksesshme të kurorës së tyre të ligës.
Pas udhëtimit për në Molineux, djemtë e Guardiolës do të qëndrojnë në rrugë për t’u përballur me West Ham, përpara se të kthehen në shtëpi për të pritur Aston Villa.
