image Zjarret në Kosovë/ Detaje nga Policia për diegien e disa pronave

Siguri

Zjarret në Kosovë/ Detaje nga Policia për diegien e disa pronave

news image

Në disa rajone të Kosovës, pjesët malore dhe fushore janë përfshirë nga zjarret, ndërkohë që po bëhet thirrje për kujdes më të madh në këtë kohë. Policia e Kosovës ka njoftuar për disa raste të zjarrvënies që janë raportuar në 24 orët e fundit, nëpër vende të ndryshme.

Në rajonin e Prishtinës janë raportuar tri raste, njëri në Drenas, në Lipjan dhe në Graçanicë.

“Fsh. Sankoc, Gllogoc 04.08.2021-13:19. Në rrethana të panjohura ka shpërthyer zjarri në pronën e ankuesit ku janë djegur hamullore dhe  pylli në hapësirë prej rreth tre hektarëve. Njësitet e zjarrfikësve kanë lokalizuar zjarrin, nuk raportohet për të lënduar.

Fsh. Brus, Lipjan 04.08.2021-12:10.  Në rrethana të panjohura ka shpërthyer zjarri në malet e fshatit, ndërsa njësitet e  zjarrfikësve  të Lipjanit, Llapnasellës e Novobërdës së bashku edhe me njësitet policore kanë arritur që të lokalizojnë zjarrin.  Sipas rojës së pyllit janë dëmtuar rreth 20 –hektarë pronë shtetërore dhe 5-hektarë male pronë private. Lidhur me rastin është informuar edhe prokurori, ndërsa rasti është duke u hetuar.

Gushtericë e epërme ,Graqanicë 04.08.2021 -17:10 Për shkaqe ende të pa njohura është përfshirë nga zjarri një objekti ndihmës pronë e ankuesit mashkull kosovar. Njësiti i zjarrfikësve ka lokalizuar dhe fikur zjarrin.”

Në njoftimin e Policisë thuhet se në rajonin e Gjilanit janë raportuar tri raste të shkaktimit të rrezikut të përgjithshëm. Në Viti dyshohet se janë përfshirë nga zjarri disa ara të papunuara, në Gjilan është arrestuar një person i cili i kishte ndezur zjarr në oborrin e depos së tij, si dhe rasti i fundit ku një i dyshuar ua kishte vënë zjarrin disa barishteve.

“Fsh. Ramjan, Viti 04.08.2021-10:30. Ankuesi kosovar ka njoftuar se disa ara të papunuara  janë përfshirë nga zjarri. Njësitet e zjarrfikësve ka lokalizuar zjarrin. Nuk raportohet për të lënduar dhe të dyshuar.

Rr. Nato-99, Gjilan 04.08.2021-18:50. Është arrestuar i dyshuari  kosovar  pasi që i njëjti në oborrin e depos së tij kishte ndezur një zjarr për t’i djegur disa mbeturina të depos, por pasi që zjarri kishte filluar të merrte përmasa, me ndihmën e qytetarëve dhe njësitet policore, kishin arritur ta lokalizojnë zjarrin. Në konsultim me prokurorin i dyshuari pas intervistimit është liruar në procedurë të rregullt. 

Fsh. Shurdhan ,Gjilan 04.08.2021-19:30 I dyshuari mashkull  kosovar  u kishte vënë zjarrin disa barishteve në një hapësirë prej rreth 2 ari ,të cilat ndodheshin në pronën e tije. I dyshuari ka arrit që ta lokalizojë vet zjarrin.”

Ndërsa në rajonin e Ferizajt, në fshatin Cërnillë, Policia ka njoftuar se janë djegur 50 hektarë të hamulloreve të grurit, si pasojë e një zjarri që ka shpërthyer.

“Fsh. Cernillë, Ferizaj 03.08.2021 – 18:30. Si pasojë e një zjarri që ka shpërthyer për shkaqe të pa njohura deri më tani janë djegur rreth 50 hektarë të hamulloreve të grurit. Zjarrfikësit kanë dalë në vendin e ngjarjes dhe e kalë lokalizuar zjarrin. Të lënduar nuk ka.

Fsh. Softaj, Ferizaj 04.08.2021 – 15:15. Si pasojë e një zjarri që ka shpërthyer për shkaqe të pa njohura deri më tani janë djegur rreth 30 hektarë të hamulloreve të grurit. Zjarrfikësit kanë dalë në vendin e ngjarjes dhe e kalë lokalizuar zjarrin. Të lënduar nuk ka.”

Edhe në Suharekë, në fshatin Peqan dyshohet se si pasojë e prishjes së një përçuesi elektrik ka shpërthyer një zjarr ku është përhap në kodrinat e fshatit Peqan dhe Sllapuzhan. Sipas Policisë njësitet e zjarrfikësve janë duke tentuar që ta shuajnë zjarrin.

Kurse në rajonin e Gjakovës, Policia ka njoftuar për rastin e djegies së një shtëpie, për të cilën Sinjali raportoi dje.

“Fsh. Qerim, Gjakovë 04.08.2021 – 06:00. Ankuesi kosovar ka raportuar se për shkaqe ende të pa njohura është përfshirë nga zjarri shtëpia e tij. Njësitë relevante policore si dhe zjarrfikësit kanë dalë në vendin e ngjarjes, zjarri  është lokalizuar. Përveç dëmeve materiale vlera e të cilave nuk dihet, të lënduar nuk ka pasur. Në lidhje me rastin është informuar prokurori i shtetit.”

Një incident zjarri është raportuar edhe në fshatin Lladroc të Malishevës, ku sipas Policisë, në rrethana të panjohura ka shpërthyer zjarri në pronën e ankuesit, ku janë djegur dy parcela me vreshta dhe pylli në hapësirë prej rreth  5 hektarëve.

Rast tjetër i zjarrvënies ka ndodhur në Skënderaj, ku një person ka raportuar se prona e tij hamullore dhe fusha janë përfshirë nga zjarri.

“Fsh. Abri e Poshtme, Skenderaj 04.08.2021-12:00. Ankuesi kosovar ka njoftuar se prona e tij hamullore dhe fusha është përfshirë nga zjarri. Njësitet e zjarrfikësve kanë lokalizuar zjarrin. Nuk raportohet për të lënduar dhe të dyshuar.”

Kujtojmë se dje Policia e Kosovës ka njoftuar se ka arrestuar një 32-vjeçar të dyshuar për kryerjen e veprës penale, zjarrvënie. I dyshuari me inicialet S.H, është shtetas i Kosovës. Sipas Policisë, zjarri ishte ndezur në fshatin Cërnushë të Mitrovicës.

/GazetaSinjali/