Zëvendësministri i Shëndetësisë, Izet Sadiku, përmes një postimi në Facebook i ka dhënë dy lajme të mira rreth situatës me koronavirus në Kosovë, shkruan Gazeta Sinjali.

Sadiku ka njoftuar se pacienti zero, që është një 77-vjeçar nga Vitia, është liruar sot nga Klinika Infektive e QKUK-së pasi është shëruar plotësisht nga koronavirusi.

Veç tjerash, ai tha se lajmi tjetër i mirë i ditës së sotme është edhe shërimi i një infermiereje të Infektivës.

“Sot në ditën e 27-të nga konfirmimi i rastit të parë me COVID19 në Kosovë, kemi dy lajme shumë të mira: Është shëruar rasti zero me COVID-19 i cili është një qytetar i Vitisë, dhe është shëruar infermierja jonë në Klinikën Infektive e cila ka 43 vite përvojë punë në klinikë”, ka shkruar Sadiku.

Ai theksoi se Kosova, me masat e ndërmarra deri më tani në luftë për parandalimin e COVID-19, po tregon sukses në menaxhimin e kësaj pandemie. /Gazeta Sinjali/