Lëvizja Vetëvendosje përmes një reagimi ka thënë se është duke mbledhur fakte dhe prova, të ndërhyrjes politike në procesin zgjedhor, dhe ndryshimin e rezultateve.

VV kërkon nga KQZ-ja të garantojë numërim të saktë të votave, si dhe sipas tyre “të mos bie pre e presioneve”.

“KQZ ka filluar rinumërimin e 1428 kutive të votimit, që përbëjnë rreth 60% të votave të përgjithshme. Rinumërimi duhet të bëhet në mënyrë profesionale, të paanshme dhe në përputhje me ligjin dhe procedurat. Votuesit kanë shprehur vullnetin e tyre, dhe se derisa nuk përfundon rinumërimi i të gjitha kutive deri në votën e fundit, rezultati mbetet ai që është shpallur nga KQZ-ja”, thuhet në reagim.

Më tutje Lëvizja Vetëvendosje, thotë se po e përcjellë me vëmendje këtë proces, si dhe përmes vëzhguesve dhe përfaqësuesve të tyre, do të ndjekë nga afër çdo fazë të rinumërimit deri në përmbyllje të procesit.

“Ashtu siç kemi qëndruar në mbrojtje të votës e vullnetit të qytetarëve në ditën e zgjedhjeve e në fazat e mëvonshme, nuk do të lejojmë që ky vullnet të dëmtohet as në rinumërim. Është evidente, që zyrtarë e gjyqtarë të institucioneve janë ndikuar politikisht në marrjen e vendimeve të fundit, me synim ndryshimin në rezultatin e zgjedhjeve të 6 tetorit. Lëvizja VETËVENDOSJE! është duke mbledhur fakte e prova të ndërhyrjes politike në marrjen e këtyre vendimeve dhe ne do të sigurohemi që të gjithë këta zyrtarë të përfshirë në këto ndërhyrje për vendime që do të duhej të ishin të bazuara në ligj e Kushtetutë, do të përgjigjen para drejtësisë.”

VV thotë poashtu se insinuatat dhe presionet nga subjekte partiake që qytetarët i kanë lënë jashtë përfaqësimit në Kuvend, në një kohë kur po rinumërohen mbi gjysma e votave të përgjithshme, kanë për synim ndikimin në rinumërim dhe krijimin e faktit të kryer të përfaqësimit në Kuvend.

“Ftojmë KQZ-në që në përputhje me përgjegjësitë që ka, të garantojë numërim të saktë të secilës votë, si dhe mos të bie pre e presioneve të tilla mbi numëruesit dhe stafin përgjegjës. Rezultati zgjedhor dhe vullneti i votuesve nuk mund të ndryshohet as me vendime administrative, e as me presion në opinionin publik nga subjekte të caktuara. Rezultati i zgjedhjeve të 6 tetorit është shprehje e qartë për ndryshim. Lëvizja VETËVENDOSJE! garanton që ky vullnet do të përmbushet në Qeverinë e ardhshme”, thuhet më tej në reagimin e VV-së.

Kujtojmë se sot gjatë ditës pati përplasje mes Vetëvendosjes dhe Nismës Socialdemokrate, për procesin e rinumërimit të vendvotimeve./Gazeta Sinjali/