Kryeministri i Republikës së Kosovës, Albin Kurti dhe ministrja e Drejtësisë, Albulena Haxhiu, kanë mbajtur një konferencë para mediave.
Kurti bashkë me Haxhiun, kanë njoftuar se Komisioni i Venecias i ka dhënë dritë jeshile, Qeverisë së Kosovës, për të vazhduar me Vettingun dhe konfiskimin e pasurisë së pajustifikueshme, shkruan Gazeta Sinjali.
“Rivlerësimin e verifikimin e aftësive të krerëve të pushtetit gjyqësor dhe prokurorial, e nisim me mekanizma të jashtëm, të pavarur nga çdo ndërhyrje. Sot jemi këtu për të prezantuar Vettingun dhe konfiskimin e pasurisë së pajustifikueshme”, tha Kurti para mediave.
Sipas të parit të Qeverisë, të dy këto janë vlerësuar lartë nga Komisioni i Venecias, pasiqë iu është dhënë besimi profesional për të jetësuar reformën e premtuar.
“Të dy këto të vlerësuara lartë nga Komisioni i Venecias që Qeverisë së Kosovës ia ka falur besimin profesional, për të jetësuar reformën e premtuar. Komisioni i Venecias na bind që reformat janë adekuate dhe në pajtim me politikat e shteteve demokratike“, është shprehur kryeministri Kurti.
