Një person është arrestuar pasi i njëjti dyshohet se ka sulmuar seksualisht dy vajza mesnatën e së enjtes në Prishtinë, raporton Gazeta Sinjali.
Burimet e Gazetës Sinjali brenda Prokurorisë kanë bërë të ditur se i dyshuari është 24-vjeçari, Drilon Dragusha.
Sinjali mëson se ngjarja ka ndodhur në rrugën ‘Dëshmorët e Kombit’, kur dy vajzat që ndodheshin në veturën e tyre janë përballur me Dragushën, i cili kishte bërë veprime vulgare duke ua ekspozuar atyre organin gjenital.
Përballë kësaj situate, vajzat kanë njoftuar Policinë e Kosovës të cilët kanë ndërmarrë veprimet hetimore duke intervistuar palët e përfshira në rast.
Pas përfundimit të procedurave policore, Prokurori i Shtetit ka nxjerrë aktvendim që 24-vjeçarit t’i caktohet masa e ndalimit në kohëzgjatje prej 48 orësh dhe i njëjti të hetohet nën dyshimet se ka kryer veprën penale ‘Sulm seksual’.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
