Presidenti i Kosovës, Hashim Thaçi thotë se është shqetësuar pasi ka dëgjuar për pasojat e tërmetit që ndodhi sot në Shqipëri.

Thaçi përmes një postimi në Facebook, ka thënë se i ka ofruar ndihmë për tejkalim të situatës dy krerëve shqiptarë.

” Me shqetësim mora lajmin për pasojat e tërmetit që ndodhi sot në Shqipëri. Në biseda telefonike me presidentin Ilir Meta dhe kryeministrin Edi Rama ju shpreha solidaritetin e shtetit dhe popullit të Kosovës, si dhe ua ofrova ndihmën tonë të pakursyer për tejkalimin e situatës “, ka shkruar Thaçi.

Po ashtu, ai ka thënë se ka kërkuar që FSK të jetë në gjendje gatishmërie.

” Kam kërkuar po ashtu nga Komandanti i FSK-së, Rrahman Rama, që FSK të jetë në gjendje gatishmërie. Të lënduarve nga shembjet e shkaktuara prej tërmetit iu uroj shërim sa më të shpejtë”, ka përfunduar Thaçi./Gazeta Sinjali/