image Shtyhet koncerti i shumëpritur i Capital T, kjo është arsyeja

Muzikë

Muzikë/ Shtyhet koncerti i shumëpritur i Capital T, kjo është arsyeja

news image

Rep-artisti i njohur shqiptar, Capital T, tash e disa javë ka paralajmëruar se më 19 shtator, do të mbajë një koncert madhështor në qendër të qytetit të Tiranës. Por, siç duket koncerti “Time Capsule” nuk do të mbahet me këtë datë, anipse kanë përfunduar të gjitha përgatitjet.

Këtë e kanë bërë të ditur ekipi i rep-artistit përmes një njoftimi për media, transmeton Gazeta Sinjali.

Ata kanë thënë se ky koncert është shtyer për 20 shtator dhe shkak është një njoftim nga Shërbimi Meterologjik Ushtarak, i cili ka komunikuar se ditën e nesërme do të ketë reshje shiu.

Ky është sqarimi i plotë i ekipit të Capital T:

“Gjithçka është gati në sheshin Nënë Tereza për tu mbajtur konçerti i shumëpritur i artistit Capital T, “Time Capsule”.

Prej ditësh stafi i artistit së bashku me organizatorët e koncertit janë zhvendosur në sheshin kryesor të Tiranës së bashku me personat përgjegjës për foninë, audion dhe skenografinë e koncertit.

Mirëpo, ndonëse prej një muaji më parë Capital T lajmëroi se koncerti do të mbahet në datën 19 shtator, në orën 19:19 në sheshin Nënë Tereza, organizatorët kanë marrë një lajm të minutës së fundit nga Shërbimi Meterologjik Ushtarak, i cili ka komunikuar se ditën e nesërme do të ketë reshje shiu përgjatë gjithë ditës, çka e vështirëson komoditetin e të pranishmëve në koncert, sikurse bëhet problem edhe për të gjitha mjetet e teknologjisë së fundit që kanë ardhur në Tiranë speçifikisht për “Time Capsule”.

Ndonëse stafi i konçertit ia doli të ketë gjithçka gati në detaje dhe artisti Capital T ka përfunduar të gjitha përgatitjet për performancën e tij, sërish, prej shkakut të motit të keq, u vendos nga bordi menaxhues dhe krijues i koncertit “Time Capsule” që ky i fundit te shtyhet për ditën e premte, më 20 shtator, në të njëjtën orë dhe në të njejtin vend.

Sigurisht, të gjitha biletat e shitura janë padiskutim të rregullta ndonëse ato shkruajnë datën 19 shtator, duke qenë sërish të vlefshme për datën 20 shtator pasi asgjë nuk ka ndryshuar as në strukturë, menaxhim apo përmbajtje të konçertit veç datës, që ishte e pashmangshme prej motit të keq.

Capital T dhe stafi i tij ju falenderojnë për durimin dhe energjinë e mirë që keni shprehur deri në këto momente, duke kërkuar ndjesë për çdo parregullsi qe mund te shkaktojë ndryshimi i datës në axhendat e të pranishmëve por me premtimin se në fund, gjithçka do t‘ia vlejë për të përmbushur me sukses misionin nga nisi e gjitha: “Time Capsule”, një mega koncert, i pari i llojit të tij në Shqipëri me një standard krejtësisht ndërkombëtar është një eksperiencë që nuk duhet humbur për asgjë.

Capital T, ju pret në sheshin Nënë Tereza, në “Time Capsule” në datën 20 shtator, ora 19:19, ku moti i mirë dhe energjia elektrizuese do ta kthejnë të gjithën në një mbrëmje të paharrueshme!”.

Ndryshe, “Sytë e tu”, është projekti i fundit muzikor i artistit që është publikuar më 4 gusht. Kënga deri më tani numëron mbi 6 milionë klikime në kanalin Youtube./Gazeta Sinjali/