Sindikata e Bashkuar e Arsimit, Shkencës dhe Kulturës (SBASHK), ka reaguar pas rastit të rëndë që u regjistrua në orët e mëngjesit të sotëm në Prishtinë, ku po dyshohet se burri, Izet Godeni, ka vrarë me sëpatë gruan e tij, Sadije Godeni.
Godeni punonte si arsimtare në shkollën “Dardania” në Prishtinë.
“Me plot dhembje e trishtim morëm lajmin për rastin tragjik në familjen Godeni. Dhembja shtohet për të gjithë punëtorët e arsimit ngase si pasojë e dhunës familjare, që ka nisur të bëhet përditshmëri, humbi jetën mësimdhënësja dhe anëtarja e devotshme e sindikatës sonë Sadije Godeni”.
“Loti e dhembja jonë bëhet bashkë me dhembjen dhe lotin e punëtorëve arsimorë në shkollën ‘Dardania’ në Prishtinë dhe në gjithë Kosovën. Të lutemi bashkë që ngjarje të tilla tragjike të mos ndodhin kurrë më”, përfundoi reagimi i SBASHK-ut.
Prokuroria Themelore ka njoftuar se i dyshuari, bashkëshorti i saj, tashmë është ndaluar për 48 orë pasi është vetëdorëzuar në Polici.
