Avokati i Popullit, Naim Qelaj, e ka arsyetuar vendimin e marrë ndaj ish-kryetares së Komisionit Qendror të Zgjedhjeve (KQZ), Valdete Daka.

Daka i ishte drejtuar këtij institucioni me kërkesë pas shkarkimit nga presidentja, Vjosa Osmani, por Qelaj thotë se me shumë kujdes e kanë shqyrtuar kërkesën e Dakës.

Mirëpo nga analizat që janë bërë ky rast sipas Qelajt, është refuzuar për arsye se nuk i ka shterur mjetet juridike.

“Ne me shumë kujdes e kemi analizuar kërkesën e zonjës Daka drejtuar institucionit të Avokatit të Popullit për të dërguar vendimin e presidentes në Gjykatën Kushtetuese për të vlerësuar se a është në pajtueshmëri me kushtetutën”.

“Pas analizës që kemi bërë me stafin profesional këshilltarët ligjor kemi ardhur në përfundim se ky rast nuk plotëson kriteret për të dërguar në Gjykatën Kushtetuese për arsye që janë dhënë vetë vendimin në formë të shkruar që është bërë publik. Kërkesa e Dakës është refuzuar për arsyen se nuk i ka shterur mjetet juridike që i ka pasur në dispozicion dhe në këtë rast kemi qenë në pamundësi për të vazhduar më tutje”. 

Ai më tej ka shtuar se në vazhdim kanë pranuar ankesa nga qytetarët sa i përket gjykimit të paanshëm që kryesisht lidhet me zvarritje të procedurave gjyqësore.

Madje, ai tha se palët ankohen që edhe përkundër infrastrukturës ligjore mungojnë të standardizuara e drejta për të ushtruar një mjet juridik, duke e konsideruar këtë si problem, raporton EO.

“Vazhdon me qëndruar edhe më tej në krye të listës e drejta për gjykim të paanshëm që kryesisht lidhet me zvarritje të procedurave gjyqësore. Ne edhe këtë vit numrin më të madh të ankesave e kemi pasur në këtë drejtim”.

“Janë edhe ankesat drejtuar nivelit qendror të ministrive lidhur me vendime të ndryshme që kanë marrë, por kryesisht lidhen me mjetin efikas juridik. Pra palët ankohen që edhe më tej përkundër infrastrukturës ligjore mungojnë të standardizuara kjo e drejtë për të ushtruar një mjet juridik dhe të drejtat nga marrëdhënia e punës”, tha Qelaj./GazetaSinjali/