OJQ “Gratë Intelektuale të Drenicës” ka protestuar pas vrasjes së Lirije Qerimajt nga bashkëshorti në Llaushë.
Protesta ka nisur nga sheshi “Adem Jashari” në Skenderaj për të vazhduar para Gjykatës e më pas Stacionit të Policisë në këtë komunë, duke thirrur “Boll më, edhe sa vrasje”, “Duam siguri”, “Qyteti është i joni, shtëpia është e jona”; “Ku me u ankua ne, deri kur vrasje”; “Qoftë e fundit kjo vrasje; “Mos i vrisni nënat tona, mos i vrisni motrat, mos i vrisni nuset”.
Sevdije Hoxha, kryetare e Grave Intelektuale të Drenicës, aktiviste për të drejtat e grave, ka kërkuar drejtësi për vrasjen e Lirije Qerimajt.
Bahtije Sejdiu, kryetare e Federatës së pensionisteve, tha se të vrasësh një grua nuk është trimëri.
Masa rigoroze nga institucionet ka kërkuar ajo për trajtimin e këtyre rasteve.
“Mos t’i lëmë fëmijë jetimë, mos t’i shkatërrojnë familjet, dashtë Zoti që mos të përsëritet asnjë vrasje tjetër. Të vrasësh gruan nuk është trimëri”.
