Kohëve të fundit është shtuar dukshëm numri i rasteve të vjedhjeve e grabitjeve, ndërsa është shqetësues numri i zbardhjes së tyre nga organet kompetente, shkruan Gazeta Sinjali.

Sinjalizues të Gazetës Sinjali bëjnë të ditur se në orët e para të mëngjesit të së enjtes, rreth orës 05:40, janë arrestuar dy persona në rrugën “Zahir Pajaziti” në Podujevë, për shkak se të njëjtit dyshohen se kanë kryer veprën penale “Vjedhje e rëndë”.

Sipas sinjalizuesve të Sinjalit, të dyshuarit, njëri i mitur e tjetri i moshës madhore, e kanë thyer një lokal Mobi Shop. 

Burime brenda Prokurorisë i kanë thënë gazetës se pas identifikimit të personave të dyshuar, gjyqtari i procedurës paraprake ka urdhëruar bastisjen e shtëpive të të dyshuarve.

Mirëpo, ky operacion rezultoi pa sukses, sepse nuk u gjetën telefonat e vjedhur nga lokali.

Këto burime bëjnë të ditur se të miturit i është caktuar masa e ndalimit për 24 orë, ndërsa për të dyshuarin tjetër është caktuar masa e ndalimit për 48 orë./GazetaSinjali/