Një ngatërresë mes pronarëve të dy agjencioneve turistike, ka ndodhur dje në orët e pasdites, në Lipjan, raporton Gazeta Sinjali. Përleshja, motivi i së cilës dyshohet të jetë çështja e ekskursioneve të nxënësve, ka eskaluar në konflikt fizik.
Burimet e Sinjalit kanë bërë të ditur se bëhet fjalë për Miran Fejzullahun, pronar i agjencionit turistik “Gmica Travel”, i cili dyshohet se u sulmua nga përfaqësuesi i “Arioza Travel”, Kastriot Gashi.
Në dëshminë e Fejzullahut të dhënë në Polici, thuhet se Gashi e ka sulmuar në zyrën e tij, pas një fjalosje që kishin pasur me njëri-tjetrin për punën e ekskursioneve.
Si rezultat i denoncimit, Policia është vënë në lëvizje dhe ka intervistuar të dyshuarin, i cili para hetuesve policorë ka thënë se nuk ka goditur viktimën, por vetëm kanë pasur mosmarrëveshje më të.
Pas marrjes së deklaratave nga dy palët, Prokurori ka vlerësuar se i dyshuari, Kastritot Gashi, duhet të ndalohet për 48 orë dhe ngarkohet me veprën penale “sulmi”.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
