Përleshjet në institucionet arsimore në Kosovë nuk janë të rralla. Në shumicën e rasteve janë të përfshirë nxënësit, të cilët rrahen në hapësirat e shkollave.
Një ngjarje e tillë ka ndodhur edhe në shkollën e muzikës “Prenk Jakova”, në Prishtinë, para dy ditësh.
Sinjali ju sjellë detaje se si ka ndodhur rasti ku u përfshinë tri nxënëse të kësaj shkolle (emra të njohur për redaksinë).
Si ndodhi ngjarja?
Burimet e Sinjalit brenda shkollës kanë bërë të ditur se fillimisht dy 15-vjeçare u fjalosën mes vete në tualetin e shkollës. Pas zënkës që vajzat patën mes vete, njëra prej tyre dyshohet se e ka sulmuar tjetrën me shuplakë.
Në ato momente në tualetin ku ndodhi ngjarja, kishte hyrë një vajzë tjetër, për të cilën viktima, e cila u sulmua mendoi se ishte shoqja e nxënëses që e goditi.
Për ta frikësuar nxënësen që hyri në tualet, vajza që u sulmua kishte nxjerrë një thikë nga xhepi.
Siç mëson Sinjali rastin në Polici e ka denoncuar drejtoresha e shkollës.
Policia pasi ka dalë në vendin e ngjarjes ka konfiskuar thikën që ia ka gjetur nxënëses, ndërsa sot e njëjta është intervistuar në Polici dhe ndaj saj është hapur rasti “Armëmbajtje pa leje”.
