Ka përfunduar seanca ndaj kreut të PSD-së, Dardan Molliqaj, i cili ka dalë sot para Gjykatës nën dyshimin se ka kryer veprën penale “sulm ndaj personit zyrtar”.
Mirëpo, vendimi për caktimin e paraburgimit do të merret brenda pak orëve.
Avokati i Molliqajt, Arbër Rexha tha se kërkesa për caktimin e paraburgimit është e paligjshme.
“Mundem me ju konfirmu se seanca për caktimin e masës së paraburgimit është mbyllë, tash presim nxjerrjen e vendimit nga gjykata. Çka mund të them për rastin, është ajo që përveç që konsiderojmë se kërkesa për caktimin e paraburgimit është e paligjshme, konsiderojmë që edhe arrestimi është bërë në mënyrë të kundërligjshme, ngase nuk janë përfill dispozitat ligjore, të cilat janë të parapara me Kod të Procedurës Penale“, tha avokati Rexha.
Zëdhënësi i PSD-së, Dren Kukaj, ka thënë para mediave se presin lirimin e liderit të tyre.
Molliqaj u arrestua, të martën, duke hyrë në studiot e një televizioni ku ishte i ftuar.
