image Paraburgim për Savçiq, mohoi gjenocidin në Srebrenicë

Rajon

Paraburgim për Savçiq, mohoi gjenocidin në Srebrenicë

news image

Gjykata e Bosnje dhe Hercegovinës ka urdhëruar ndalimin e Milomir Savçiq, gjeneralit në pension, pasi ai mohoi faktet e vendosura nga gjykata mbi gjenocidin e Srebrenicës në disa paraqitje publike.

Savçiq, 62-vjeç, është paraqitur në gjyq në vitin 2020 në Gjykatën e Bosnje dhe Hercegovinës, nën akuzat për krime lufte, duke përfshirë ndihmën dhe mbështetjen e gjenocidit të më shumë se 8.000 burrave dhe djemve boshnjakë të Srebrenicës.

Më parë gjykata e lejoi atë të qëndrojë në liri derisa të zgjasë gjykimi i tij, por me ndalimin e paraqitjeve publike dhe komentimin e fakteve që lidhen me atë procedurë, të cilat i referoheshin edhe karakterit të krimeve për të cilat akuzohet, kurse tani me kërkesë të Zyrës së Prokurorit të Bosnje dhe Hercegovinës, atij i është caktuar paraburgimi për të paktën një muaj.

Gjykata pranoi vërejtjet e prokurorit Ibra Buliq, i cili tha se Savçiq kishte shkelur masat e ndalimit pasi kishte vënë në dyshim publikisht kualifikimet në aktakuzën kundër tij. Ai gjithashtu kundërshtoi ndryshimet në Kodin Penal të Bosnje dhe Hercegovinës, të cilat i vendosi ish-përfaqësuesi i Lartë për Bosnje dhe Hercegovinë Valentin Inzko, për dënime me burg për ata që mohojnë krimet e luftës, përfshirë gjenocidin në Srebrenicë.

Savçiq u tha mediave serbe se ai ishte kundër “dogmës së Srebrenicës”, duke u bërë thirrje serbëve të vazhdojnë të dëshmojnë se atje nuk kishte gjenocid.

Bazuar në vendimin e gjykatës, Savçiq duhet të ndalohet menjëherë, edhe pse avokati i tij Miodrag Stojanoviq njoftoi se do të apelonte.

Gjatë luftës në Bosnje dhe Hercegovinë, Savçiq ishte një nga bashkëpunëtorët më të afërt të Ratko Mlladiq, i dënuar me burgim të përjetshëm para Gjykatës Penale Ndërkombëtare për ish -Jugosllavinë (MICT) në fillim të këtij viti pasi u shpall fajtor për krime lufte.

Ndër të tjera, Savçiq shërbeu si komandant i regjimentit të mbrojtjes në selinë e ushtrisë të kryesuar nga krimineli Mlladiq.

Sipas aktakuzës, anëtarët e regjimentit të Savçiq u përfshinë drejtpërdrejt në vrasjet e të paktën një mijë boshnjakëve të zënë robër në Nova Kasaba.

/Gazeta Sinjali/