Në mëngjesin e sotëm, një 43-vjeçar ka raportuar në Polici se është kërcënuar nga një person tjetër në fshatin Magjarë të Malishevës.
Burimet e Sinjalit njoftojnë se viktima ka deklaruar në Polici se është kërcënuar nga i dyshuari derisa ka qenë duke punuar në pronën e tij bashkë me disa punëtorë të tjerë.
Sipas tij, shkaku i kërcënimit ka qenë se i dyshuari nuk është pajtuar që prona të blihet nga viktima dhe kësisoj nuk e ka lejuar ta punoj tokën.
Burri 43-vjeçar ka treguar para zyrtarëve policorë se i dyshuari u ka thënë atyre “ndaleni punën menjëherë dhe largohuni nga këtu” dhe e ka kapur atë për krahu duke vazhduar me fjalë kërcënuese.
“Do t’i dërgoj njerëzit te shpia dhe nuk do ta gëzosh kurrë këtë pronë”, citohet t’i ketë thënë i dyshuari viktimës.
Siç mëson Sinjali, i dyshuari është kapur e më pas është ndaluar për 48 orë.
