Qeveria nigeriane ka urdhëruar prokurorët federalë të arrestojnë dhe të ndjekin penalisht përdoruesit e Twiiter-it, pas vendimit që u mor këtë të premte për ndalimin e përdorimit të këtij rrjeti social, përcjell Gazeta Sinjali.

Prokurori i Përgjithshëm dhe Ministri i Drejtësisë i Nigerisë, Abubakar Malami, lëshoi ​​direktivën të shtunën në një deklaratë të nënshkruar në emër të tij nga zëdhënësi i tij, Dr. Umar Jibrilu Gwandu.

Prokurori i Përgjithshëm udhëzoi rregullatorin e komunikimit të vendit, NCC dhe Ministrinë e Komunikimit dhe Ekonomisë Digjitale të bashkëpunojnë me prokurorët “për të siguruar ndjekjen e shpejtë të shkelësve të ligjit pa ndonjë vonesë të mëtejshme“, shkruan CNN.

Ministria e Informacionit dhe Kulturës e Nigerisë njoftoi “pezullimin e pacaktuar” të operacioneve të Twitter-it në Nigeri në një deklaratë të premten, vetëm rreth dy ditë pasi kompania fshiu një cicërimë të postuar nga presidenti, Muhammadu Buhari, që u perceptua gjerësisht si ofenduese.

Ndalimi i Twitter-it në Nigeri u zbatua me shpejtësi, pasi faqja e Twitter ishte e paarritshme për shumë nigerianë nga orët e hershme të së shtunës.

Sidoqoftë, disa nigerianë ishin në gjendje të anashkalonin ndalimin, përmes përdorimit të një rrjeti privat virtual (VPN), i cili lejon përdoruesit të hyjnë në rrjetet publike me lidhje të koduara të internetit.

Gwandu, zëdhënësi i Prokurorit të Përgjithshëm, tha të shtunën se kushdo që ende cicëron do të sillet para ligjit.

“Çdo shkelës, qofshin individë ose organizata, do të ndiqet penalisht,” tha Gwandu. “Thjesht, detyra e prokurorëve të zbulojnë modalitetet e gjetjes së atyre që shkelin,” shtoi ai.

Gwandu vërejti se ligjet e Nigerisë nuk garantojnë liri absolute, ndërsa u përgjigj nëse është e ligjshme të ndiqet penalisht qytetarët që i binden ligjit, të cilët kanë të drejtë për lirinë e mendimit, shprehjes dhe privatësisë.

“Si i quani ata që i binden ligjit, kur ata shkelin ligjet… kur ata duan të krijojnë kërdi, të krijojnë çështje të kryengritjes, krim dhe po nxisin urrejtje midis nigerianëve?”, tha prokurori i përgjithshëm.

“Çdo liri ka përgjegjësi të caktuara. Asnjë liri nuk është absolute. Ata që kapen do të mësojnë se çfarë lloj ndjekje penale i pret“, tha Gwandu./Gazeta Sinjali/