Policia e Kosovës ka njoftuar se më rastin e vizitës zyrtare të presidentit të Shqipërisë, Bajram Begaj, nga data 16 shkurt deri më 18 shkurt do të kujdesen që të ofrojnë siguri dhe mirëmbajtje të rendit dhe qetësisë publike gjatë kohës së lëvizjes dhe qëndrimit të delegacionit shtetëror në Kosovë.
“Policia e Kosovës, gjatë kësaj vizite, do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë”, thuhet në komunikatën e PK-së.
Ndër të tjera, PK ka njoftuar se për të mundësuar qarkullimin e lirë do të ketë ndërprerje të përkohshme të qarkullimit të trafikut, të disa segmenteve rrugore ku pritet të kalojë eskorta.
Po ashtu do të ketë ndërprerje edhe në disa lokacione ku parashihen të realizohen aktivitete zyrtare.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete zyrtare”, theksohet në komunikatën për media të Policisë së Kosovës.
Policia ka njoftuar se edhe për rastin e 15-vjetorit të shpalljes së pavarësisë së Kosovës, për shkak të lëvizjeve të personaliteteve dhe pjesmarrësve do të ketë ndërprerje të disa segmenteve rrugore për qarkullim të automjeteve.
Lidhur me këto ndërprerje PK ka njoftuar se do të orientohet trafiku në rrugë alternative.
Ndërsa, nga Policia kanë kërkuar mirëkuptim prej qytetarëve dhe pjesmarrësve në trafik.
Ndryshe, Begaj do të qëndrojë për vizitë zyrtarë dy ditë në Kosovë dhe sot do të pritet në takim nga presidentja e Kosovës, Vjosa Osmani, takim i cili do të fillojë nga ora 11:00.
