image Nesër do të kërkohet interpelancë për faljen e gjobave gjatë pandemisë

Politikë

Nesër do të kërkohet interpelancë për faljen e gjobave gjatë pandemisë

news image

Në një nga pikat e rendit të ditës në mbledhjen që do të mbahet nesër nga ora 12:00 nga Kryesia e Kuvendit, do jetë edhe interpelanca me ministrin e Financave, Punës dhe Transfereve, Hekuran Murati, për faljen e gjobave ndaj bizneseve që kanë shkelur masat antiCOVID, shkruan Gazeta Sinjali.

“Interpelancë me ministrin e Financave, Punës dhe Transfereve, Hekuran Murati për çështjen “Falja e gjobave bizneseve të prekura nga situata me COVID-19”, thuhet se do jetë pika e katërt e rendit të ditës në mbledhjen e nesërme të kryesisë.

Gjithashtu, pika e fundit e rendit të ditës do të jetë edhe propozimi i një kandidati të ri për gjyqtar të Gjykatës Kushtetuese.

Nga qeveria do kërkohet edhe falja e gjobave që u shqiptuan ndaj qytetarëve si rezultat i mos-respektimit të masave të përcaktuara për parandalimin e transmetimit të virusit. Partia Socialdemokrate (PSD) ka bërë me dije se, përmes një peticioni i cili tashmë ka marrë mbi 5 mijë nënshkrime, sapo të arrihen 10 mijë persona pro peticionit, ky i fundit do të dërgohet në Kuvend.

Konform Ligjit për Parandalimin dhe Luftimin e Pandemisë COVID-19, vetëm përgjatë 4 ditëve të muajit maj, (10-14 maj), policia ka shqiptuar 3,063 gjoba.

/Gazeta Sinjali/