Sekretari i Përgjithshëm i NATO-s, Jens Stoltenberg ka folur në një konferencë shtypi në Bruksel.
Ai tha se aleanca është e shqetësuar se Kina mund të mbështesë pushtimin rus të Ukrainës, duke shtuar se 30 vendet anëtare do të diskutojnë rolin e Pekinit në luftë të enjten.
“Kina i ka ofruar Rusisë mbështetje politike, duke përfshirë përhapjen e gënjeshtrave dhe dezinformatave flagrante”, tha Stoltenberg.
Ai përmendi gjithashtu shqetësimet se Kina mund të sigurojë “mbështetje materiale” për Rusinë.
Dhe në një paralajmërim të ripërtërirë, ai tha: “Çdo përdorim i armëve kimike do të ndryshonte totalisht natyrën e konfliktit, do të ishte një shkelje e hapur e ligjit ndërkombëtar dhe do të kishte pasoja të gjera“.
Stoltenberg shtoi se liderët e vendeve të NATO-s do të bien dakord në samitin e tyre nesër për të forcuar forcat në krahun lindor të aleancës, me vendosjen e katër grupeve të reja beteje në Bullgari, Hungari, Rumani, Sllovaki, shkruan SkyNews.
“Unë pres që udhëheqësit të bien dakord për të forcuar qëndrimin e NATO-s në të gjitha fushat, me rritje të mëdha në pjesën lindore të aleancës në tokë, në ajër dhe në det“, tha ai.
Ai tha se me grupet e reja të betejës dhe forcat ekzistuese në vendet baltike dhe Poloni, NATO do të kishte tetë grupe shumëkombëshe përgjatë krahut lindor të aleancës.
Kjo vjen pasi Moska lëshoi paralajmërime të tmerrshme më herët sot mbi sugjerimet që Polonia mund të dërgonte një forcë paqeruajtëse në Ukrainë.
