Mjeku shqiptar, Erion Dasho, ka kërkuar që të ndërpritet vaksinimi në Shqipëri me vaksinën kineze kundër COVID-19, CoronaVac, pas vdekjes së dy personave që kanë marrë këtë vaksinë, shkruan Gazeta Sinjali.

Ai përmes një postimi në Facebook i është drejtuar Ministrisë së Shëndetësisë lidhur me këtë.

“Për shkak të të paktën dy vdekjeve të papritura midis personave që kanë kryer vaksinën CoronaVac (një prej të cilave rast i investiguar personalisht që humbi jetën një ditë pas vaksinimit), i rekomandoj Ministrisë së Shëndetësisë, Komitetit të COVID dhe Komitetit të Imunizimit të pezullojnë përkohësisht fushatën e imunizimit me CoronaVac derisa këto vdekje të investigohen dhe të provohen si të palidhura me vaksinën në fjalë“, ka shkruar ai në Facebook.

Ai thotë se kjo thirrje nuk ka qëllim të ngjallë panik dhe të dëmtojë një proces të dobishëm siç është imunizimi ndaj COVID, por thotë se është në përputhje me praktikat e mira ndërkombëtare të farmakovigjilencës.

“Dy humbje jete midis rreth 50 mijë të vaksinuarve është një tregues që kërkon kujdes të jashtëzakonshëm! Mbetem i hapur për të komunikuar me përfaqësues të ministrisë dhe komitetit lidhur me rastin që kam investiguar personalisht”, ka shkruar ai në postim./Gazeta Sinjali/