Një aksident në trafik që ndodhi në rrugën ‘Shefqet Shkupi’ në Prishtinë, ka nxjerrë blof një vajzë të re, e cila përfundoi në ndalim policor si e dyshuar për dy vepra penale, raporton Gazeta Sinjali.
Burimet e Gazetës Sinjali brenda Prokurorisë kanë bërë me dije se bëhet fjalë për Albenita Hyseni, 19-vjeçare.
Hyseni dyshohet se ka kryer veprat penale ‘Shpërdorim i pasurisë së huaj’ dhe ‘Vjedhja e identitetit dhe pajsjes së qasjes’.
Por si u zbulua nga organet e rendit?
Albenita Hyseni ditë më parë kishte shfrytëzuar dokumentet e një personi tjetër dhe me anë të tyre kishte marrë një veturë me qera.
Ajo dyshohet se me identitetin e dikujt tjetër, ka vozitur për një kohë të caktuar automjetin të cilin e kishte marrë me qira. Por asaj nuk i shkoi gjithçka vaj, pasi që u përfshi në një aksident trafiku.
19-vjeçarja nga frika se do të zbulohej, kishte braktisur veturën e aksidentuar, por që më pas e njëjta është arritur që të identifikohet dhe të arrestohet.
Pas përfundimit të procedurave policore, Prokurori i Shtetit ka nxjerrë aktvendim që të dyshuarës t’i caktohet masa e ndalimit në kohëzgjatje prej 48 orësh.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
