Që prej shpalljes së pavarësisë në vitin 2008, integrimi në NATO ka qenë një nga prioritetet kryesore qeveritare. Kjo kërkesë u riaktualizua ditët e fundit pas sulmit të Rusisë në Ukrainë. Refuzimi i Serbisë për vendosjen e sanksioneve ndaj Rusisë dhe mos-dënimi i agresionit të saj ndaj ukrainasve, u bë një nga shkaqet që Kosova të kërkojë anëtarësimin e përshpejtuar në organizatën më të madhe të sigurisë në botë, shkruan Gazeta Sinjali.
Ministri i Mbrojtjes në Kosovë, Armend Mehaj, kërkoi nga Shtetet e Bashkuara të Amerikës, Bashkimi Evropian, Britania e Madhe dhe Kanadaja që të reagojnë ndaj deklaratave të Serbisë lidhur me zhvillimet e fundit në Ukrainë.
Përmes një letre, ai ka bërë thirrje që të përshpejtohet anëtarësimi i Kosovës në NATO dhe vendosja e Bazës së Përhershme të Forcave Amerikane në Kosovë.
“Anëtarësimi i përshpejtuar i Kosovës në NATO dhe vendosja e Bazës së Përhershme të Forcave Amerikane, është nevojë imediate për garantimin e paqes, sigurisë dhe stabilitetit në Ballkanin Perëndimor dhe më gjerë”, kishte shkruar Mehaj në një postim në rrjetin social Facebook.
Pas Mehajt, edhe presidentja e vendit, Vjosa Osmani, ka thënë se anëtarësimi i Kosovës në institucionet euro-atlantike është më i domosdoshëm se kurrë.
“Duke parë atë që po ngjanë në Ukrainë, është e natyrshme që Kosova të anëtarësohet në NATO”, ka deklaruar ajo në një konferencë të përbashkët me presidentin turk, Recep Tayyip Erdogan, gjatë vizitës së saj në Turqi.
Ndërkohë kryetari i Kuvendit të Kosovës, Glauk Konjufca, ka thënë se është shumë e rëndësishme që Kosova të anëtarësohet në Aleancën Veri-Atlantike – NATO.
Konjufca ka thënë që është krijuar një momentum i ri të cilin Kosova do ta shfrytëzojë.
“Vet anëtarët e NATO-së kërkojnë që edhe Kosova të jetë sa më shpejtë pjesë e familjes euroatlantike, kjo është një situatë e re”, shtoi Konjufca.
Ai gjithashtu ka deklaruar se institucionet duhet t’i kushtojnë vëmendje asaj se çfarë është duke ndodhur në Evropë dhe se nuk përjashton mundësinë e një konflikti të armatosur me Serbinë, shkruan Gazeta Sinjali.
Kjo sepse sipas tij, Qeveria e Serbisë synon pushtimin e territorit të Kosovës ashtu siç është duke tentuar Rusia në Ukrainë, duke thënë se ekziston mundësia që Serbia të shkel marrëveshjet të cilat janë nënshkruar në vitin 1999 ndonëse trupat e NATO-së janë në Kosovë.
E edhe kryeministri i Kosovës, Albin Kurti, në një intervistë dhënë të martën për Sky News, ka thënë se Kosova duhet të jetë sa më shpejt anëtare e NATO-s.
“Ne duam të anëtarësohemi në BE dhe NATO. Aktualisht kemi NATO-n në Kosovë, por sa më shpejt të anëtarësohemi në NATO do të jetë më mirë për popullin e Kosovës, për Republikën e Kosovës por për gjithë rajonin dhe kontinentin evropian në përgjithësi”, tha Kurti.
Pas kërkesave të krerëve të shtetit për anëtarësimin e Kosovës në NATO, qytetarët kosovarë filluan një fushatë në të gjitha rrjetet sociale.
Nga jehona e madhe që mori, hashtagu #KosovoInNATO u bë trend në rrjetin social Twitter.
Pas gjithë këtyre deklaratave, nuk kishte si të mungonte edhe reagimi i Serbisë.
Presidenti serb, Aleksandar Vuçiq, ka thënë se anëtarësimi i Kosovës në këtë aleancë, nuk është ide e kosovarëve, por e politikanëve nga SHBA-ja.
“Ata kështu duan të detyrojnë katër vendet e BE-së që janë anëtare të NATO-s të njohin Kosovën e pavarur. Ne nuk jemi naivë. Serbia do t’i përmbahet ligjit ndërkombëtar, ne do të respektojmë integritetin tonë territorial”, tha ai në një konferencë.
Ndërsa ministri i Brendshëm serb, Aleksander Vulin, ka bërë një deklaratë në stilin e presidentit rus, Vladimir Putin, duke thënë se anëtarësimi i Kosovës në NATO është kërcënim ushtarak për Serbinë. Njëjtë kishte deklaruar edhe Putin për Ukrainën para se të fillonte agresionin e tij ushtarak.
Vulin thotë se anëtarësimi i Kosovës në NATO përveç që kërcënon Serbinë nënkupton edhe anulimin e rezolutës 1244 dhe Marrëveshjen ushtarake të Kumanovës.
“Kosova s’është shtet, s’ka ushtri, është problem politik për të paktën 4 shtete të NATO-s dhe s’do të ketë kapacitete ushtarake për një kohë të gjatë. Prandaj pse është e rëndësishme të bëhet anëtare e NATO-s pa procedura dhe përmbushje të kushteve? Anëtarësimi i Kosovës në paktin e NATO-s është kërcënim ushtarak për Serbinë dhe asgjë tjetër. Duke e anëtarësuar Kosovën në aleancën ushtarake të NATO-s anulohen Rezoluta 1244, shfuqizohet Marrëveshja e Kumanovës dhe të gjitha garancitë e OKB-së, por gjithashtu obligon të gjithë anëtarët e NATO-s që ta mbrojnë integritetin territorial të anëtarit të ri. A dyshon dikush që në këtë rast Kurti do të ngurronte të sulmonte serbët veçanërisht në veri dhe të provokonte konflikte derisa Serbia të detyrohej të mbronte popullin e saj”, ka thënë Vulin.
Për dallim nga Serbia, shteti tjetër fqinj, Maqedonia e Veriut, ka shprehur gatishmërinë e saj për mbështetjen e Kosovës për anëtarësim në NATO dhe në organizata ndërkombëtare.
Këtë e ka konfirmuar kryetari i Kuvendit të Maqedonisë së Veriut, Talat Xhaferi, në një konferencë pas takimit me homologun e tij kosovar, Glauk Konjufca.
“Ne si Republikë e Maqedonisë së Veriut kemi qëndrim afirmativ ndaj aderimit të Republikës së Kosovës në të gjitha forumet dhe nismat multilaterale dhe rajonale dhe do të vazhdojmë edhe më tej në mbështetjen e anëtarësimit të Kosovës në të gjitha organizatat ndërkombëtare ku jemi anëtarë me fuqi votues”, ka thënë ai.
Po ashtu edhe presidenti i Turqisë, Recep Tayyip Erdogan, ka thënë se do ta ndihmojë Kosovën për anëtarësim në NATO, siç e ka ndihmuar për të siguruar njohje të reja.
“Ne si vend i rëndësishëm në NATO nuk shohim asgjë që nuk shkon sa i përket anëtarësimit të Kosovës në këtë aleancë dhe për të mbështetur këtë proces. Do të ndërmarrim hapat tona, siç ndihmuam në procesin e njohjeve do të bëjmë njëjtë edhe në procesin e anëtarësimit të Kosovës në NATO”, tha Erdogan në konferencën e përbashkët me presidenten Osmani.
Por, shteti i Kosovës ende nuk ka aplikuar formalisht për anëtarësim në NATO.
Deri më sot, shteti kosovar mbetet vendi i vetëm në rajon që nuk ka ndonjë formë të marrëdhënies kontraktuale me Aleancën.
Dhjetë vjet më parë, Kosova aplikoi për t’u bërë pjesë e Partneritetit për Paqe, por kjo nuk u mundësua për shkak se Forca e Sigurisë së Kosovës, kishte statusin e organizatës për ndërhyrje në emergjenca dhe katastrofa natyrore dhe jo atë të ushtrisë.
Në vitin 2016, qeveria e Kosovës bëri përpjekje të përsëritur për të forcuar bashkëpunimin me NATO-n, por ishte Spanja, një nga vendet e BE-së që e kundërshtoi atë. Në vitin 2017, megjithatë, NATO pranoi ta forcojë bashkëpunimin e saj me FSK, por vetëm midis forcës paqeruajtëse të KFOR-it që ka mandat nga OKB-ja dhe zyrës ndërlidhëse dhe ekipit këshillues të NATO-s në Prishtinë.
