Ministri i Shëndetësisë, Rifat Latifi, në Komisionin Parlamentar për Shëndetësi, ka thënë se rastet e reja me COVID-19 mund të rriten edhe më shumë në ditën e ardhshme.
Megjithatë, ai është shprehur se shtetet tjera kanë numër edhe më të lartë të rasteve të reja me COVID se Kosova.
“Është pritë me u rrit rastet, kanë me shku ndoshta edhe më lartë numri i të infektuarve, megjithatë ne jemi mirë, Sllovenia i ka në një ditë 5 mijë e 349 raste, Serbia 2 mijë e 300, Kroacia 2 mijë e 100, te ne mesatarisht për një million banorë i kemi 1 mijë e 500 raste”, ka deklaruar ai.
Derisa është kritikuar për neglizhencë nga deputeti i LDK-së, Armend Zemaj, Latifi ka thënë se të gjithë anëtarët e ministrisë po kryejnë punën e tyre dhe po e administrojnë mirë gjendjen.
“Nuk ka neglizhencë këtu, ka administrim të mirë. Ne të gjithë kemi mësu mësime dhe kemi me bo më mirë herëve tjera. Unë po ju them juve me përgjegjësinë më të madhe se nuk ka neglizhencë, secili anëtarë i Ministrisë së Shëndetësisë është në krye të detyrës së bashku me të gjithë profesionistët”, ka shtuar ai.
