Kryeministri i Kosovës, Albin Kurti, tha se nuk i frikësohet ndërhyrjes ushtarake të Serbisë në Kosovë, edhe pse nuk e përjashton këtë mundësi dhe shtoi se në atë rast “rezistenca do të ishte e suksesshme” dhe se ai mbështetet në NATO-n, SHBA-në dhe BE-në. Ndryshe nga Kosova, i tha Kurti N1 të Bosnjës, Serbia do të “llogariste në Rusinë dhe Kinën”.
Kurti tha se shumë gjeneralë dhe zyrtarë serbë do të donin që Kosova të sulmohej.
“Kjo nuk do të thotë se ata nuk shpresojnë në rrethana të reja në të ardhmen kur mund të sulmojnë. Serbia e di se situata nuk është si para 20 viteve. Rezistenca jonë do të ishte e suksesshme në atë rast”, tha Kurti.
Kurti tha se pak muaj para fillimit të konfliktit në Ukrainë, në shtator të vitit 2021, se ministri i Mbrojtjes i Serbisë së bashku me ambasadorin rus kanë ardhur në kufirin e Kosovës ku kanë vizituar forcat ushtarake serbe.
“Në atë kohë ne ishim në kontakt të rregullt me NATO-n dhe KFOR-in sepse Serbia donte të dërgonte mesazhin se bashkë me Rusinë mund ta pushtojë sërish Kosovën. Muajt e fundit ata kanë marrë armë nga Kina. Pra, Serbia mbështetet në Rusinë dhe Kinën, dhe kur ata llogarisin në to, ne llogarisim edhe në NATO, SHBA dhe BE”, tha Kurti.
Ai përsëriti se Serbia “nuk do të lejohet” të nisë një ofensivë, edhe pse ai nuk e përjashton absolutisht një gjë të tillë sepse, sipas tij, Serbia “ka 48 baza rreth kufirit”.
“Një nga arsyet pse Serbia thotë se nuk do ta njohë Kosovën është sepse dëshiron të ketë marrëdhënie sa më të mira me Rusinë dhe Kinën. Kur Serbia e thotë këtë, nuk po na thotë neve por Rusisë sepse dëshiron t’i tregojë Moskës se do vazhdon të jetë guvernatori i saj edhe pse merr paratë e BE-së përfundoi Kurti.
