Një shtetas kosovar dhe një tjetër që ka njërin prind me shtetësi të Kosovës kanë humbur jetën nga përmbytjet në Gjermani, konfirmoi Zyra për Informim e Ministrisë së Punëve të Jashtme dhe Diasporës (MPJD) në Kosovë.

“Bazuar në të dhënat zyrtare, deri më tani ka humbur jetën një person me shtetësi kosovare, si dhe një person tjetër që ka njërin prind me shtetësi të Kosovës, përderisa viktima mban shtetësinë gjermane”, thuhet në përgjigjen e kësaj ministrie për REL.

Gjermania, javën e kaluar, është përfshirë nga përmbytje masive.

Mbi 160 njerëz kanë humbur jetën, ndërsa mbi 150 mbeten të zhdukur.

Dy landet më të prekura nga përmbytjet janë: Rajnland Falc dhe Nordrajn Vesthalen.

Kancelarja gjermane, Angela Merkel, vizitoi të martën zonat e përmbytura në landin Nordrajn Vesthalen, ku premtoi ndihmë emergjente për njerëzit e prekur.

“Do të bëhen të gjitha përpjekjet që paratë të arrijnë shpejt te njerëzit. Shpresoj që kjo të realizohet brenda ditësh”, tha Merkel.

Kancelarja ka vizituar ditë më parë edhe zonat e prekura në Rajnland Falc./Gazeta Sinjali/