Komuna e Klinës ka nënshkruar kontratë në vlerë prej 9 mijë e 855 euro për furnizim me mjete mbrojtëse për parandalimin e pandemisë së koronavirusit.

Kontrata me kompaninë fituese “KosovaMed Healthcare” Sh.P.K. nga Prishtina është nënshkruar brenda 6 ditëve përmes procedurës së negociuar pa publikim të njoftimit për kontratë.

Tenderi ishte iniciuar më 27 mars dhe është nën shkruar më 1 prill.

“Kompania fituese do ta furnizojë Komunën e Klinës me 3 mijë copë maska shumë-përdorimëshe, 300 kombilizon mbrojtës shumë-përdorimësh dhe 3 mijë dorëza një-përdorimëshe. Blerja e masave mbrojtëse vjen pas një vendimi të Këshillit Emergjent për nevoja të situatës për stafin mjekësor dhe institucioneve të tjera për parandalimin e pandemisë”, thuhet në komunikatën për media.

Klina ka qenë një ndër komunat e para e cila është përballur me një person të prekur me coronavirus.

Në Kosovë, që nga 13 marsi kur edhe është lajmëruar rasti i parë, numri i të infektuarve me koronavirus ka arritur në 125, ndërsa 10 persona janë shëruar dhe një person ka vdekur./GazetaSinjali/