Emrat e shtetasve të Kosovës dhe të Maqedonisë, janë të gjithë emra shqip. Shqipëria nuk figuron për shkak të numrit të vogël të shtetasve të saj në Zvicër.

Zyra Federale për Statistikë, ka publikuar të martën statistikat e emrave më të shpeshtë personalë në Zvicër.

Këtu përfshihen, ndaras, emrat e fëmijëve të lindur në vitin 2020 dhe emrat në përgjithësi, që mbizotërojnë në popullatë.

Listat e emrave dominues të shtetasve të Kosovës dhe atyre të Maqedonisë së Veriut përmbajnë, praktikisht, vetëm emra shqiptarësh.

Noah, ishte emri më i popullarizuar në 2010, 2011 dhe 2013 deri në 2017. Ndërkaq, 507 djem kanë marrë këtë emër vitin 2020, duke dalë sërish i pari.

Emri i djalit Liam është dhënë 372 herë ndërsa Matteo 359 herë.

Ashtu si Noah në mesin e djemve, emri Mia ka qenë për disa vite në krye të listës së emrave të vajzave, përkatësisht në 2013, 2015 dhe 2016.

Që nga viti i kaluar listës i janë shtuar edhe 461 vajza  me këtë emër, pra, Mia, zë sërish vendin e parë.

Emrin e dytë më të popullarizuar, Emma, e kanë marrë 407 vajza ndërsa 350 foshnje janë pagëzuar me emrin Mila.

Ndërsa, sa u përket banorëve të Zvicrës me origjinë nga Evropa Lindore, shpërndarja është shumë më e barabartë se tek shtetasit zviceranë, vëren sda.ch.

Kështu, tek qytetarët kosovarë, dhjetë emrat më të njohur janë vënë në masë pothuaj të barabartë: Emri Arben është pak përpara Valonit, i ndjekur nga emrat: Bekim, Blerim, Leon, Alban, Burim, Liridon, Jeton dhe Ilir që janë praktikisht në të njëjtin nivel.

Lista e emrave të vajzave me prejardhje nga Kosova duket kështu: Fatime, Shqipe, Merita, Vlora, Valentina, Shpresa, Ganimete, Vjollca, Emine, Edona.

Me pak ndryshime paraqitet edhe lista e emrave të banorëve të Zvicrës me prejardhje nga Maqedonia e Veriut, shkruan albinfo.ch.

Në listën “mashkullore”, këtu prin emri Bekim, i ndjekur nga ai Muhamed, Fatmir, Arben, Amir, Ajan, Besnik, Amar, Enis dhe Adem.

Ndërsa, lista e emrave të grave/vajzave me prejardhje nga Maqedonia e Veriut kryesohet nga emri Fatime, sikur në rastin e Kosovës. Pas saj vijnë emrat: Sara, Emine, Medina, Ajshe, Merita, Marija, Anisa, Suzana dhe Erina. /GazetaSinjali/