Prokuroria Themelore në Prizren ka parashtruar kërkesën për caktimin e masës së sigurisë ndaj Lirim Thaqit, i cili u arrestua nën dyshimet për fajde gjatë aksionit të djeshëm të Hetimeve Rajonale të Policisë, raporton Gazeta Sinjali.
Zëdhënësja e Prokurorisë në Prizren, Fitore Mehmeti, ka bërë të ditur për Sinjalin se është parashtruar kërkesë për caktimin e masës së paraburgimit.
“Lidhur me rastin të cilit i referoheni, ju njoftojmë se Prokuroria Themelore në Prizren- Departamenti i Krimeve të Rënda, ka parashtruar kërkesë për caktimin e masës së paraburgimit, kundër L.Th., për shkak të dyshimit të bazuar se i njëjti ka kryer veprat penale “Fajdeja” nga neni 331 dhe “Detyrimi” nga neni 328, të Kodit Penal të Republikës së Kosovës (KPRK)”, tha Mehmeti për Sinjalin.
Ndryshe burimet e Gazetës Sinjali bëjnë të ditur se Lirim Thaqi, 39-vjeçar, është pronar i një biznesi që funksionon si autoservis ‘Cani’.
Gjatë bastisjes në banesën e tij dhe punëtorinë, Policia ka sekuestruar dokumente e telefona, që do shfrytëzohen si dëshmi në procedurë.
Arrestimi i tij erdhi pas hetimeve me masa të fshehta të vëzhgimit, që mundësuan identifikimin e të dyshuarit dhe mbledhjen e informacioneve për veprën për të cilën po dyshohet.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
