Të premten në Prizren u arrestua një person, i cili dyshohet se e kanosi zyrtarin e Gjykatës Themelore të Prizrenit. Sot, kjo Gjykatë ka marrë vendim ndaj të dyshuarit F.H, shkruan Gazeta Sinjali.
Të dyshuarit i është caktuar masa e paraburgimit në afat kohor prej 30 ditësh.
Si ka ndodhur ngjarja?
Sipas Gjykatës, në mesditën e 21 janarit, punëtori i Gjykatës shkon ta njoftojë të dyshuarin se djali i tij duhet të paraqitet në Gjykatë dhe ia ofron ftesën, me ç’rast i dyshuari revoltohet.
Pas kësaj, i dyshuari fillimisht tenton t’i vërsulet fizikisht e pastaj e ofendon dhe e kërcënon me fjalët “kam me ju vra edhe ty edhe gjyqtarët nëse bjen kësi letra”
Sipas njoftimit, këto fjalë viktimës i kanë shkaktuar frikë, ankth dhe pasiguri.
