Sot iu dha lamtumira e fundit gazetares së RTK-së, Ardita Sylejmani-Bllaca, ajo vdiq të enjten si pasojë e komplikimeve gjatë lindjes.

Shumë qytetarë, familjarë, e kolegë u mblodhën sot për t’i dhënë lamtumirën e fundit, 32-vjeçares Sylejmani-Bllaca. Varrimi u bë në varrezat e qytetit në “Arbëri”.

Në emër të familjes Sylejmani-Bllaca, foli axha i saj, Fehmiu, i cili tha se gazetarja Ardita Sylejmani-Bllaca nuk ishte vetëm e jona, por e të gjithë shikuesve që ndoqën storiet e saj përmes mediumit publik.

“Ardita nuk ishte vetëm e jona, ajo ishte e gjithë folësve shqip, që kanë hapur atë dritare, dhe kanë dëgjuar zërin e saj. Kërkojmë si familje t’ia bëni hallall”, tha ai.

Ardita Sylejmani-Bllaca vdiq në Budapest të Hungarisë. Që nga viti 2010, ajo ka punuar si gazetare në Radio Televizionin e Kosovës. Ishte bashkëshortja e Shpend Bllacës, i punësuar në stafin diplomatik të  Kosovës në Hungari. Ajo la pas vetes bashkëshortin dhe tre fëmijë. /Gazeta Sinjali/